Шавкат Мирзиёев ва Владимир Путин Ўзбекистонда АЭС қурилишига старт берди
Қурилиш ишлари халқаро стандартлар ва ХАЭА назорати остида амалга оширилмоқда.
Шавкат Мирзиёев ва Владимир Путин Ўзбекистонда интеграциялашган атом электр стансиясининг биринчи энергия блокини қуриш ишларини расман бошлаб бердилар. Бу ҳақда Президент матбуот хизмати хабар берди.
Маросимда телекўприк орқали Халқаро атом энергияси агентлиги (ХАЭА) бош директори Рафаел Гросси ҳам иштирок этди.
Ўзбекистон раҳбари лойиҳа амалга оширилишини қўллаб-қувватлагани учун Россия президенти ҳамда ХАЭА бош директори Рафаел Гроссига миннатдорлик билдирди. Шунингдек, мамлакатимизда илк атом электр стансиясини барпо этишда иштирок этаётган Ўзбекистон ва Россия мутахассисларининг фидокорона меҳнати ва юксак малакасига алоҳида эътироф этилди.
Қайд этилишича, мазкур лойиҳа Ўзбекистоннинг технологик, саноат ва илмий ривожланишида муҳим босқич бўлиб, мамлакатда атом энергетикаси соҳасини шакллантириш учун мустаҳкам асос яратади. Лойиҳа кичик модулли атом генерацияси ҳамда йирик энергетика йўналишидаги энг илғор технологияларни ўзида мужассам этган.
Шавкат Мирзиёев атом энергетикаси соҳасида хавфсизлик масаласи устувор аҳамиятга эга эканини таъкидлаб, стансияни қуриш ва фойдаланишга топшириш ишлари энг юқори халқаро стандартлар асосида ҳамда ХАЭАнинг доимий назорати остида амалга оширилаётганини қайд этди.
Таъкидланишича, ушбу стратегик лойиҳа Ўзбекистон ва Россия ўртасидаги кенг қамровли стратегик шериклик ҳамда иттифоқчилик муносабатларини янада мустаҳкамлашга хизмат қилади.
