Сурхондарёда 45 млн сўм қарз бериб, 128 млн талаб қилганлар ушланди
Қарзни ундириш мақсади бир эркак йўлланган бўлиб, у айтилган суммани тайёрлаб бермаса, қарз олувчиларнинг ҳаётига нуқта қўйиши билан таҳдид қилган.
Сурхондарёда товламачилик билан шуғулланган шахслар қўлга олинди. Бу ҳақда Ички ишлар вазирлиги хабар берди.
Маълум қилинишича, 1986 йилда туғилган икки нафар аёл Денов тумани Ички ишлар бошқармасига мурожаат қилиб, гумонланувчи аёл улардан мавжуд қарз миқдоридан бир неча баравар кўп маблағ талаб қилаётганини билдирган.
Жумладан, бир ҳолатда 45 миллион сўм қарз эвазига 128 миллион сўм, иккинчи ҳолатда эса 50 миллион сўм қарзга нисбатан 140 миллион сўм пул талаб қилингани қайд этилган. Шунингдек, қарзни ундириш мақсадида воситачи сифатида жалб этилган эркак жабрланувчиларга нисбатан зўравонлик ва ҳаётига таҳдид қилиш ҳолатларини содир этган.
Мазкур мурожаатлар асосида 15 май куни Денов туманида тезкор тадбир ўтказилиб, гумонланувчилар пул маблағларини олаётган вақтда ашёвий далиллар билан қўлга олинган.
Ҳозирда ҳолат юзасидан Денов тумани ИИБ ҳузуридаги тергов бўлими томонидан Жиноят кодексининг 165-моддаси 1-қисми (товламачилик) билан жиноят иши қўзғатилган ва дастлабки тергов ҳаракатлари олиб борилмоқда.
