Ўзбекистонда 5 ойда 59 та наркожиноий гуруҳ фаолиятига чек қўйилди

 

Жорий йилнинг январ–май ойларида ҳуқуқ-тартибот органларининг тезкор бўлинмалари ҳамкорлигида уюшган наркожиноятчилик ҳамда жиноий гуруҳлар фаолиятига қарши кенг кўламли комплекс тезкор тадбирлар амалга оширилган.

 

Натижада наркотик воситаларни тарқатиш билан шуғулланган 59 та йирик уюшган наркожиноий гуруҳ фаолиятига чек қўйилган. Мазкур гуруҳларнинг 15 нафар етакчиси ва 199 нафар аъзоси қўлга олинган. Шунингдек, 15 та яширин нарколаборатория фош этилган.

 

Тезкор тадбирлар давомида 1,2 тонна анъанавий наркотик моддалар, 54 килограмм синтетик наркотик воситалар, 4,6 миллион дона психотроп дори воситалари ҳамда 3 тоннадан ортиқ ноқонуний прекурсорлар мусодара қилинган. Мутахассислар қайд этишича, ушбу жиноий тармоқлар фаолиятининг тўхтатилиши натижасида катта миқдордаги наркотик моддаларнинг ноқонуний айланиши олди олинган.

 

Шунингдек, наркожиноятчиликка қарши курашиш йўналишида Қозоғистон, Тожикистон ва Қирғизистон Республикаларининг ваколатли органлари билан ҳамкорликда 7 маротаба халқаро тезкор тадбирлар ўтказилган. Таҳлилларга кўра, ноқонуний наркотик айланмасининг қисқариши “қора бозор”даги нархларнинг сезиларли ошишига ҳам сабаб бўлган.

 

Уюшган гуруҳий жиноятчиликка қарши кураш доирасида эса 40 та йирик жиноий гуруҳ фаолиятига барҳам берилган. Уларнинг 48 нафар етакчиси, жумладан, 6 нафари хорижий давлатларда ушланиб Ўзбекистонга олиб келинган. Шунингдек, 224 нафар гуруҳ аъзоси қўлга олинган.

 

Мазкур жиноий гуруҳлар мамлакатнинг 50 та шаҳар ва туманида талончилик, безорилик, товламачилик, тадбиркорлик фаолиятига тўсқинлик қилиш ҳамда фуқароларга тан жароҳати етказиш каби оғир ва ўта оғир жиноятларни содир этиб келгани маълум қилинган.