Зеленский билан учрашидан маъно кўрмаяпман — Путин
Путин Зеленскийнинг мактуби айрим жиҳатлари билан қўпол оҳангда ёзилганини ва уни самимий музокара таклифи сифатида қабул қилмаганини айтди.
Россия президенти Владимир Путин Украина президенти Володимир Зеленскйй томонидан урушни якунлаш масаласини муҳокама қилиш учун юзма-юз учрашув ўтказиш таклифи билдирилган очиқ мактубга муносабат билдириб, ҳозирча бундай учрашув учун асос кўрмаётганини маълум қилди. Бу ҳақда Reuters хабар берди.
Маълум қилинишича, Путин Россиянинг йиллик иқтисодий форумидаги чиқиши чоғида Зеленскийнинг мактуби айрим жиҳатлари билан қўпол оҳангда ёзилганини ва уни самимий музокара таклифи сифатида қабул қилмаганини айтди.
Россия раҳбарининг таъкидлашича, мактубдаги айрим иборалар юзма-юз мулоқот учун шароит яратишга эмас, аксинча, бундай учрашувнинг амалга ошмаслигига хизмат қилгандек таассурот уйғотган.
Россиянинг йиллик иқтисодий форумида саҳнада туриб журналистларнинг Зеленский билан учрашиш эҳтимоли ҳақидаги саволига жавобан Путин:
“Мен ҳозирча бунинг ҳеч қандай маъносини кўрмаяпман”, — деди.
Бир кун аввал халқаро оммавий ахборот воситалари вакиллари билан учрашувда Россия президенти Украинадаги уруш юзасидан ўзининг қатъий позициясини яна бир бор такрорлади. Унинг сўзларига кўра, Россия қўшинлари фронт чизиғида ҳар куни олдинга силжимоқда.
Шу билан бирга, Путин АҚШ президенти Доналд Трамп томонидан илгари сурилган тинчлик ташаббуслари Киев муросага тайёр бўлган тақдирда ҳарбий ҳаракатларни тўхтатишга хизмат қилиши мумкинлигини қайд этди.
Россия ва Украина эса бир-бирини можарони дипломатик йўл билан ҳал этиш учун зарур бўлган муросага тайёр эмасликда айблаб келмоқда.
Нашр қайд этишича, Россиядаги айрим миллатчи гуруҳлар ва шарҳловчилар Зеленскийнинг очиқ мактубини урушни тугатишга қаратилган ташаббус эмас, балки Россия ичида норозилик кайфиятини кучайтиришга қаратилган сиёсий ва ахборот кампанияси сифатида баҳолади.
Зеленскийнинг очиқ мактуби ва Путиннинг унга берган жавоби Россия-Украина урушини дипломатик йўл билан ҳал этиш истиқболлари юзасидан муҳокамалар давом этаётган бир пайтда эълон қилинди.
