АҚШ ва Эрон яна бир-бирига зарба берди
Эрон АҚШ ҳаракатларига жавобан минтақадаги “душман базалари”га ракета ҳужуми уюштирганини билдирди.
АҚШ ва Эрон ўртасида Форс кўрфази минтақасидаги вазият яна кескинлашди. Томонлар ўртасида амалда бўлган сулҳга қарамай, ҳар икки давлат бир-бирининг ҳарбий обектларига зарбалар бергани ҳақида хабарлар тарқалди.
АҚШ Марказий қўмондонлиги (CENTCOM) маълумотига кўра, Эрон томонидан Қувайт ва Баҳрайн йўналишида учирилган еттита баллистик ракетадан олтитаси ҳаво ҳужумидан мудофаа тизимлари томонидан йўқ қилинган, яна бири эса нишонга етиб бормаган.
Бундан аввал АҚШ ҳарбийлари Ҳормуз бўғози ҳудудида ҳаракатланган тўртта Эрон дронини тутиб қолганини маълум қилган. Шундан сўнг АҚШ кучлари Эроннинг Қешм ороли ва Горук ҳудудларидаги қирғоқ кузатув радар обектларига зарба берган.
Қувайт ва Баҳрайнда ҳаво ҳужуми сиреналарнинг янграгани ҳамда портлашлар эшитилгани ҳақида хабарлар тарқалди. Қувайт ҳарбийлари ракета ва дрон ҳужумлари қайтарилганини маълум қилган.
Ўз навбатида, Эрон Ислом инқилоби қўриқчилари корпуси АҚШнинг Эрон ҳудудларига берган зарбаларига жавобан минтақадаги “душман базалари”га ракета ҳужумлари уюштирилганини билдирди.
CENTCOM эса ҳужумлар оқибатида америкалик ҳарбийлар орасида қурбонлар қайд этилмаганини, Баҳрайндаги АҚШнинг 5-флоти базасига зарар етказилгани ҳақидаги даъволар ҳақиқатга тўғри келмаслигини таъкидлаган.
Баҳрайн Ташқи ишлар вазирлиги Эроннинг ракета ҳужумларини қоралаб, буни минтақа давлатлари суверенитетига қарши ҳаракат сифатида баҳолаган.
Таҳлилчиларга кўра, янги кескинлик дунёнинг муҳим энергетика йўлакларидан бири ҳисобланган Ҳормуз бўғозидаги хавфсизлик ва халқаро энергия бозорларидаги барқарорликка салбий таъсир кўрсатиши мумкин.
