Навоийда алиментдан қарздор ота тандир ичидан топилди
Унинг қарздорлиги қарийб 71 миллион сўмни ташкил этган.
Навоий вилоятининг Кармана туманида алимент тўловларини узоқ муддат давомида тўламасдан келган фуқаро Мажбурий ижро бюроси ходимлари томонидан қўлга олинди. Бу ҳақда Навоий вилоят суди матбуот хизмати хабар берди.
Маълум қилинишича, фуқаронинг алимент бўйича қарздорлиги қарийб 71 миллион сўмни ташкил этган. У икки йил давомида суд қарори билан белгиланган мажбуриятларини бажармасдан, алимент тўловларидан бўйин товлаб келган.
Қидирув тадбирлари давомида Мажбурий ижро бюроси ходимлари қарздорни яшаш манзилида аниқлаган. Текширув жараёнида фуқаро уй ҳовлисидаги ёзги ошхонада жойлашган тандир ичида яширингани маълум бўлган.
Кўрилган чоралар натижасида қарздор ушланиб, қонунчиликда белгиланган тартибда жавобгарликка тортилган. Суд қарорига асосан унга нисбатан 15 сутка маъмурий қамоқ жазоси тайинланган.
