Тошкентда ИИБ биносида ППХ ходимига пора таклиф қилган шахс қўлга олинди
Унинг машинасидан ўткир ҳидли модда солинган пакетлар топилган.
Чилонзор туманида ҳуқуқ-тартибот органлари ходимларига пора беришга уриниш билан боғлиқ ҳолат фош этилди. Бу ҳақда Тошкент шаҳар ИИББ хабар берди.
Жорий йил 27-март куни тунги соат 00:30 ларда ППХ инспекторлари томонидан “Сеоул Мун” сайилгоҳи автотураргоҳида шубҳали ҳаракатлари билан эътиборни тортган Ж.Қ ва З.Ж. лар тўхтатилиб, текширув ўтказилган.
Текширув давомида 1998-йилда туғилган З.Ж бошқарувида бўлган MG5 Scorpio автомашинаси кўздан кечирилганда, ичидан ўткир ҳидли модда солинган пакетлар аниқланиб, процессуал тартибда расмийлаштириб олинган.
Шундан сўнг фуқаро З.Ж аниқланган ҳолат юзасидан ҳуқуқий чора кўрилмаслиги эвазига сафдор Қамариддин Бекмуродовга 7 000 АҚШ доллари миқдорида пора таклиф қилган. Бироқ ходим ушбу ноқонуний таклифни рад этиб, ҳолат юзасидан ички ишлар органларининг тегишли бўлинмасига мурожаат қилган.
Кейинчалик, Чилонзор туман ИИБ биносида ўтказилган тезкор тадбир давомида фуқаро З.Ж пора сифатида 7 000 АҚШ долларини бераётган вақтда ашёвий далиллар билан қўлга олинган.
Мазкур ҳолат юзасидан Чилонзор туман прокуратураси томонидан Ўзбекистон Республикаси Жиноят кодексининг 211-моддаси (“Пора бериш”) билан жиноят иши қўзғатилиб, тергов ҳаракатлари олиб борилмоқда.
