Толибон юзини ёпмаган ва тор кийинган аёлларни қамоққа олиш билан огоҳлантирди
Ҳужжатда намоз рўмолисиз, юзи очиқ ҳолда, тор кийимларда ёки пардоз қилиб кўчага чиққан аёллар Толибоннинг ахлоқ назоратчилари томонидан қўлга олиниши қайд этилган.
Афғонистоннинг Ҳирот вилоятида Толибон аёлларнинг кийиниш қоидаларига риоя этилиши устидан назоратни кучайтирмоқда. Маҳаллий манбалар ва Аmu TV қўлга киритган ҳужжатга кўра, белгиланган талабларга амал қилмаган аёллар ҳибсга олиниши мумкин.
Хабарга кўра, Толибоннинг Эзгуликка буюриш ва ёмонликдан қайтариш бошқармаси эркак оила аъзоларини аёлларнинг жамоат жойларида “тўғри ҳижоб” қоидаларига риоя этишини таъминлашга чақирган.
Ҳужжатда намоз рўмолисиз, юзи очиқ ҳолда, тор кийимларда ёки пардоз қилиб кўчага чиққан аёллар Толибоннинг ахлоқ назоратчилари томонидан қўлга олиниши ва аёллар сақлаш муассасаларига юборилиши мумкинлиги қайд этилган.
Шунингдек, аёлларнинг кийиниш қоидаларига риоя этишига оила эркаклари жавобгар ҳисобланади. Ҳужжатда қоидабузарликлар суд органларига юборилиш ва бошқа ҳуқуқий чоралар кўрилишига сабаб бўлиши мумкинлиги таъкидланган.
Маҳаллий манбаларга кўра, ушбу кўрсатма Толибон вакиллари иштирокидаги йиғилишдан сўнг қабул қилинган. Тарқалган аудиоёзувда янги тартиблар 6 июнь кунидан кучга кириши айтилган. Маҳалла вакиллари ва масжид имомларига аҳолини янги талаблар ҳақида огоҳлантириш топширилган.
Сўнгги ойларда Ҳиротнинг Шаҳр-э Нав, 29 Ҳут айланмаси, Бакробод ва Лайлами йўли каби ҳудудларида назорат пунктлари ташкил этилиб, автомобиллар ва таксилар текширувдан ўтказилаётгани маълум қилинган. Аҳоли вакилларининг айтишича, назоратчилар айрим аёлларнинг кийимларини Толибон стандартларига мос эмас деб баҳолаган.
Толибон 2021 йилда ҳокимиятга қайтганидан буён аёллар ва қизларга нисбатан қатор чекловларни жорий этган. Инсон ҳуқуқлари ташкилотлари маълумотларига кўра, бу даврда аёлларнинг таълим, меҳнат ва жамоат ҳаётидаги иштирокини чекловчи 100 дан ортиқ фармон қабул қилинган.
Аввалроқ, Толибон етакчиси томонидан “Турмуш ўртоқларни ажратиш тамойиллари” деб номланган 31 моддадан иборат ҳужжат тасдиқлангани, унда қизлар 12 ёшида турмушга чиқишлари мумкин ва бундай никоҳни бекор қилиш деярли имконсизлиги маълум қилинган эди.
