АҚШда маҳкумлар қатл этилиши мумкин
Доналд Трамп тегишли қарорни қабул қилса, бу АҚШ ҳарбий тизими томонидан 1961 йилдан буён амалга ошириладиган илк қатл бўлади.
АҚШ армияси “Қатъий адолат” (Оператион Resolute Justice) деб номланган махсус режа доирасида ҳарбий судлар томонидан ўлим жазосига ҳукм қилинган маҳкумларни қатл этиш жараёнига тайёргарлик кўрмоқда.
ABC News маълумотларига кўра, режа маҳкумларни Канзас штатидаги Форт-Левенворт ҳарбий қамоқхонасидан Индиана штатининг Терре-Ҳот шаҳридаги федерал қатл муассасасига кўчиришни назарда тутади. Ҳужжатда АҚШ Президенти томонидан ўлим жазолари тасдиқланганидан сўнг уларни ижро этиш учун зарур ташкилий чоралар кўриш белгиланган.
АҚШ қонунчилигига мувофиқ, ҳарбий судлар ўлим жазосини тайинлаши мумкин, бироқ ҳукм фақат президентнинг алоҳида тасдиғидан кейин ижро этилади.
Нашрнинг ёзишича, агар Доналд Трамп тегишли қарорни қабул қилса, бу АҚШ ҳарбий тизими томонидан 1961 йилдан буён амалга ошириладиган илк қатл бўлади. Мамлакат тарихидаги сўнгги ҳарбий қатл айнан ўша йили амалга оширилган.
Жорий йил апрель ойида АҚШ Адлия вазирлиги федерал даражадаги ўлим жазосини қўллаш амалиётини тиклашга қаратилган бир қатор чораларни эълон қилган эди. Улар орасида ўлимга олиб келувчи инъекция протоколини қайта жорий этиш ва айрим ҳолларда отиб ташлаш усулидан фойдаланиш имкониятини кенгайтириш ҳам бор.
Шунингдек, бу қарорлар собиқ президент Жо Байден маъмурияти даврида амалда бўлган федерал қатл бўйича мораторий бекор қилинганидан кейин қабул қилинган.
Эслатиб ўтамиз, Доналд Трамп 2024-йилги сайловолди кампанияси давомида АҚШ фуқароларини ўлдирган муҳожирларга нисбатан ўлим жазосини қўллаш ташаббусини илгари сурган эди.
