Олий суд таркибида Комплаенс назорати хизмати ташкил этилади
Комплаенс хизмати коррупциянинг олдини олиш, ходимлар томонидан қонунчилик ва касб этикаси талабларига риоя этилишини мониторинг қилиш билан шуғулланади.
Президент Шавкат Мирзиёев судларда комплаенс назорат тизими самарадорлигини оширишга бағишланган тақдимот билан танишди.
Унда суд тизимида коррупсиявий хавф-хатарларни барвақт аниқлаш, манфаатлар тўқнашувининг олдини олиш ҳамда ходимларнинг масъулиятини оширишга қаратилган таклифлар муҳокама қилинди.
Хусусан, суд аппарати ходимлари орасида коррупциянинг олдини олиш мақсадида Олий суд таркибида Комплаенс назорати хизматини ташкил этиш таклиф қилинди. Мазкур хизмат тўғридан-тўғри Олий суд раисига бўйсуниб, ҳудудий судларда фаолият юритувчи комплаенс инспекторларидан иборат бўлади.
Тақдимот давомида суд тизимида коррупциянинг олдини олиш бўйича қатор бошқа чоралар ҳам муҳокама қилинди. Хусусан, судлар аппаратида хавфи юқори бўлган лавозимлар рўйхати тасдиқланади, хавф даражаси юқори жараёнларни рақамлаштириш ва инсон омилини камайтириш чоралари кўрилади.
Шунингдек, судьялар ва суд аппарати ходимлари учун даромад ҳамда мол-мулк декларацияларини тақдим этиш ва таҳлил қилишнинг автоматлаштирилган электрон тизимини жорий этиш, коррупция ва интизом бузилишлари хавфини аниқловчи ахборот тизимларини ишга тушириш режалаштирилаётгани маълум қилинди.
Бундан ташқари, суд аппаратига ишга қабул қилиш тизимини очиқ танлов ва меритократия тамойиллари асосида ташкил этиш, номзодларнинг касбий ва ахлоқий сифатларини баҳолашнинг замонавий механизмларини жорий этиш таклиф этилди.
Ходимлар учун манфаатлар тўқнашувига олиб келувчи фаолият ва тадбиркорлик билан шуғулланиш, чет элда ҳисобварақ очиш каби чекловлар назарда тутилади.
Тақдимотда суд аппарати ходимлари учун ихтисослашган хизмат кийимини жорий этиш таклифи ҳам кўриб чиқилди. Бу ходимлар масъулияти, хизмат интизоми ва этика маданиятини мустаҳкамлашга хизмат қилиши қайд этилди.
Давлат раҳбари суд тизимида шаффофлик, ҳалоллик ва адолат муҳитини мустаҳкамлаш фуқароларнинг судларга бўлган ишончини оширишда муҳим омил эканини таъкидлаб, илгари сурилган таклифларни пухта ишлаб чиқиш юзасидан топшириқлар берди.
