АҚШ Жаҳон чемпионати ҳакамини мамлакатга киритмади

АҚШ ҳукумати сомалилик футбол ҳаками Умар Абдулқодир Артаннинг мамлакатга киришига рухсат бермади. Шу сабабли у 2026-йилги FIFA Жаҳон чемпионати доирасидаги фаолиятини бошлай олмайди. Бу ҳақда Reuters хабар берди.

 

FIFA маълумотига кўра, Артан дам олиш кунлари АҚШ ҳудудига киритилмагани сабабли турнир олдидан машғулотларда қатнаша олмайди ва мусобақа ўйинларини бошқара олмайди. У Жаҳон чемпионати учрашувини бошқарадиган илк сомалилик ҳакам бўлиши кутилаётганди.

 

Сомали ҳукумати ҳакамнинг АҚШга киришига рухсат берилиши учун АҚШ ва FIFA билан музокаралар олиб борганини, бироқ бу уринишлар самара бермаганини маълум қилди. Мамлакат Спорт вазирлиги Артаннинг халқаро майдондаги ютуқлари Сомали халқи учун фахр манбаи эканини таъкидлади.

 

Reuters агентлигига кўра, Сомали расмийлари ҳакамнинг турнирда иштирок этишини таъминлаш бўйича дипломатик саъй-ҳаракатларни давом эттирмоқда.

 

FIFA эса иммиграция ва виза масалалари мезбон давлат ваколатига киришини билдириб, ташкилот бундай қарорларни қабул қилиш жараёнида иштирок этмаслигини маълум қилди. FIFA расмий сайтида Артан қайси учрашувни бошқариши керак бўлгани ҳақида маълумот берилмаган.

 

АҚШ Божхона ва чегара назорати хизмати маълум қилишича, шанба куни Истанбулдан Маямига келган Сомали фуқароси қўшимча текширувдан ўтказилган ва текширув натижалари асосида мамлакатга киритилмаган. Идора бундай қарор миллий хавфсизлик, ҳуқуқни муҳофаза қилиш ва иммиграция маълумотлари асосида ҳар бир ҳолат бўйича алоҳида қабул қилинишини билдирган.

 

ОАВ хабарларига кўра, 2025 йилда Африканинг энг яхши эркак ҳаками деб топилган Артанда АҚШга кириш учун амалдаги виза мавжуд бўлган.

 

Артаннинг ўзи эса вазиятга қарамай, ҳакамлик фаолиятини давом эттириш ва келажакдаги вазифаларга эътибор қаратишини маълум қилган.