Эрон билан келишув 2 ҳафта ичида якунланиши мумкин — Трамп
АҚШ президентининг таъкидлашича, Вашингтон ва Теҳрон ядровий келишув бўйича якуний босқичга яқинлашган.
АҚШ президенти Доналд Трамп Эрон билан олиб борилаётган музокаралар икки ҳафта ичида якунланиши ва томонлар ўртасида якуний келишувга эришилиши мумкинлигини маълум қилди. Бу ҳақда CNN хабар берди.
Трампнинг айтишича, ҳозирда АҚШ ва Эрон ўртасида музокаралар давом этмоқда ва Теҳрон “ядровий қуролдан воз кечишга” ҳамда кенг кўламли келишув доирасида АҚШ билан ҳамкорлик қилишга тайёрлик билдирмоқда.
“Менимча, биз бу жараёнда устунликка эришмоқдамиз. Кейинги икки ҳафта ичида тўлиқ ғалабани эълон қилишимиз мумкин. Бу жуда тез содир бўлади ва натижада нефт нархлари ҳам пасаяди”, — дея таъкидлаган АҚШ президенти.
Унинг таъкидлашича, Эрон томони келишувга эришишга интилмоқда, бироқ жараённинг чўзилишига уларнинг “қатъий ва мағрур позицияси” сабаб бўлмоқда.
“Улар фахрланишади, айрим қарорларни қабул қилишга шошилмаяпти, лекин охир-оқибат бунга мажбур бўлишади”, — деган Трамп.
Шунингдек, АҚШ президенти аввалроқ келишувга эришилган тақдирда ҳам Эроннинг юқори даражада бойитилган уран захиралари назоратга олиниши ва йўқ қилиниши мумкинлигини билдирган эди.
