“Эҳтиёт бўл, акс ҳолда Эрон билан ёлғиз қоласиз” — Трамп Нетаняхуни огоҳлантирди
АҚШ президенти навбатдаги ҳужумлар содир бўлса, Вашингтон Тел-Авивни қўллаб-қувватлаш масаласини қайта кўриб чиқиши мумкинлигини билдирди.
АҚШ президенти Доналд Трамп Исроил бош вазири Бенжамин Нетаняхуни Эрон билан боғлиқ ҳарбий ҳаракатларда эҳтиёткор бўлишга чақирди ҳамда зарурат туғилганда Вашингтон Тел-Авивни қўллаб-қувватлаш масаласини қайта кўриб чиқиши мумкинлигини билдирган.
CNN'га берган интервюсида Трамп Нетаняхуга: “Ҳаракатларингда жуда эҳтиёт бўлишинг керак. Чунки жуда тез орада Эрон билан ёлғиз қолиб кетишинг мумкин”, деганини маълум қилган.
АҚШ президентининг айтишича, Вашингтон ва Теҳрон ўртасидаги музокараларда воситачилик қилаётган беш давлат Исроил раҳбариятига босим ўтказиш бўйича ундан ёрдам сўраган.
Трамп, шунингдек, Исроил томонидан Эрон ҳудудига уюштирилган айрим ҳарбий амалиётлар ҳақида АҚШ томонига кеч хабар берилганини таъкидлаган.
“Исроилликлар бизга янгиланган маълумотларни жуда кеч етказишди. Улар аллақачон Эрон томон йўл олган эди. Мен ҳужум кўламини қисқартиришга муваффақ бўлдим”, деган АҚШ президенти.
Аввалроқ Эрон Исроил Мудофаа кучларининг Байрут чеккасига уюштирган ҳужумидан сўнг Исроил ҳудудига ракета зарбалари бергани ҳақида хабарлар берилган эди.
