Ҳимоядаги хатолардан кўра жамоамиздаги ижобий жиҳатларни кўпроқ кўрдим — Фабио Каннаваро

 

Ўзбекистон миллий терма жамоаси бош мураббийи Фабио Каннаваро Нидерландияга қарши ўртоқлик учрашувидан сўнг жамоа ўйини юзасидан ўз фикрларини билдириб ўтди.

 

Мутахассиснинг таъкидлашича, жамоа кучли рақибга қарши майдонда кўплаб ижобий жиҳатларни намойиш эта олган.

 

“Ҳисоб 1:0 бўлган вазиятда ҳам футболчиларимиз ўйин тартибини йўқотмади. Жамоа бўлиб ҳаракат қилишда давом этдик ва баҳс охиригача курашдик. Бундай даражадаги терма жамоаларга қарши ўйнаш осон эмас, бироқ учрашув давомида кўплаб ижобий жиҳатларни кўрдим”, — деган мураббий.

 

Каннаваро бундай учрашувлар футболчилар учун муҳим тажриба мактаби эканини таъкидлаб, кучли рақибларга қарши баҳсларда жамоа янги сабоқлар олишини қайд этган.

 

Ҳимоядаги хатолар ҳақида фикр билдирган мутахассис футболни хатоларсиз тасаввур қилиб бўлмаслигини айтди.

 

“Футболда хатолар бўлиб туради. Бу нормал ҳолат. Бизнинг вазифамиз футболчиларга бундай хатолар сонини камайтиришда ёрдам беришдир. Аммо ростини айтсам, бугун ҳимоядаги камчиликлардан кўра жамоамиздаги ижобий жиҳатларни кўпроқ кўрдим”, — деди у.

 

Шунингдек, бош мураббий жамоанинг жисмоний тайёргарлиги бўйича олиб борилган ишлардан қониқиш ҳосил қилганини маълум қилган. Унинг сўзларига кўра, тайёргарлик жараёни бир ойдан ортиқ давом этган, легионер футболчилар эса кейинроқ йиғинга қўшилган.

 

“Жисмоний тайёргарлик борасида яхши иш олиб борганимизга ишонаман. Албатта, айрим футболчилар билан боғлиқ ҳал этилиши керак бўлган масалалар мавжуд ва биз бу йўналишдаги ишларни давом эттирамиз”, — дея қўшимча қилган Каннаваро.