Ўзбекистонда чет элликлар учун махсус солиқ режими жорий этилади

 

Олий Мажлис Қонунчилик палатаси депутатлари хорижий фуқаролар учун махсус солиқ режимини жорий этиш ҳамда профессионал кадрлар тайёрлаш тизимини такомиллаштиришга қаратилган қонун лойиҳасини биринчи ўқишда маъқуллади.

 

Қонун лойиҳасига кўра, чет эл фуқароларига махсус солиқ режими жорий этилиши режалаштирилмоқда. Ҳужжатда бундай шахсларни махсус тартиб асосида солиқ резиденти сифатида тан олиш механизми ҳам назарда тутилган.

 

Лойиҳага мувофиқ, хорижий фуқаролар белгиланган миқдордаги тўловни амалга ошириши, шунингдек, ваколатли банк ёки крипто-активлар айланмаси бўйича лицензияга эга платформаларда ҳисоб очиши лозим бўлади.

 

Шунингдек, қонун лойиҳаси билан махсус солиқ режимидан фойдаланувчи хорижликларнинг вояга етган яқин қариндошлари Ўзбекистон ҳудудидан ташқарида олган даромадларини солиққа тортишдан озод этиш тартибини жорий этиш таклиф қилинмоқда.

 

Ҳужжатда дуал таълим тизимини қўллаб-қувватлашга қаратилган нормалар ҳам ўрин олган. Жумладан, дуал таълим асосида таҳсил олаётган ходимлар иш ҳақидан ундириладиган ижтимоий солиқ ставкасини икки баравар камайтириш таклиф этилмоқда.

 

Депутатлар мазкур қонун лойиҳаси хорижий инвесторлар ва малакали мутахассисларни жалб этиш, инвестиция муҳитини янада яхшилаш, шунингдек, иқтисодиётнинг турли тармоқлари учун замонавий билим ва кўникмаларга эга кадрлар тайёрлашга хизмат қилишини таъкидлади.