Эронда 20 минг киши сувсиз қолди
АҚШ ҳужумлари сабаб мамлакатда иккита йирик сув омбори вайрон бўлган.
АҚШнинг Эрон ҳудудига берган зарбалари оқибатида Ҳормозгон вилоятида камида 20 минг киши ичимлик суви таъминотисиз қолди. Бу ҳақда вилоят сув таъминоти ва санитария компанияси бош директори Ҳамза Пурга таяниб Fars маълум қилди.
Унинг сўзларига кўра, Куҳестак шаҳри ҳамда Бамани ҳудудидаги 10 та қишлоқни ичимлик суви билан таъминлаб келган инфратузилма обектлари ҳужумлар натижасида вайрон бўлган. Хусусан, сиғими 500 ва 2000 куб метр бўлган иккита бетон сув омбори жиддий зарар кўрган.
“20 минг нафарга яқин аҳолига хизмат кўрсатиб келган ичимлик суви тақсимлаш тизими АҚШ ҳужумлари натижасида ишдан чиқди”, — дя та'кидлаган Ҳамза Пур.
Маълум қилинишича, ҳодисадан сўнг қатор қишлоқларда сув таъминоти тўхтаган. Ҳозирда маҳаллий ҳокимият ва масъул ташкилотлар аҳолини муқобил манбалар орқали сув билан таъминлаш чораларини кўрмоқда.
Эрон ОАВлари аввалроқ АҚШ томонидан Ҳормозгон вилоятининг Сирик шаҳри ҳудудидаги сув инфратузилмасига зарбалар берилгани ҳақида хабар қилган эди. Ҳужумлар оқибатида айрим телекоммуникация обектлари ҳам зарар кўргани билдирилган.
АҚШ Марказий қўмондонлиги маълумотларига кўра, зарбалар Ҳормуз бўғози яқинида АҚШнинг AH-64 Apache вертолёти йўқ қилингани ортидан амалга оширилган. Шундан сўнг Эрон томони Яқин Шарқдаги айрим АҚШ ҳарбий обектларига жавоб зарбалари берганини маълум қилган.
