Қирғизистонда террорчилик ҳужумларини режалаштирган 31 киши қўлга олинди
Операция давомида қурол-яроғ, экстремистик адабиётлар ва нақд пул мусодара қилинди.
Қирғизистон Миллий хавфсизлик давлат қўмитаси (ГКНБ) томонидан Ўш ва Боткен вилоятларида ўтказилган кенг кўламли аксилтеррор операцияси давомида террорчилик фаолиятида гумон қилинаётган 31 нафар шахс қўлга олинди. Бу ҳақда For.kg нашри хабар берди.
Маълум қилинишича, махсус тадбирлар 9-июн куни амалга оширилган. Тергов маълумотларига кўра, қўлга олинганлар “Катиба ат-Тавҳид вал-Жиҳод” ҳамда ИШИД террорчилик ташкилотлари билан алоқадор бўлиб, ҳуқуқни муҳофаза қилувчи органлар ходимлари ва диний етакчиларга қарши террорчилик ҳужумларини режалаштирган.
Операция натижасида Ўш вилоятида 11 нафар, Боткен вилоятида эса 20 нафар гумонланувчи қўлга олинган.
Тинтувлар давомида диний-экстремистик мазмундаги материаллар, тўртта ўқотар қурол ҳамда нақд пул маблағлари мусодара қилинган.
Қирғизистон махсус хизматлари ҳозирда қўлга олинганларнинг эҳтимолий шерикларини аниқлаш, шунингдек, гуруҳнинг молиялаштириш манбалари ва алоқаларини ўрганиш бўйича тергов-суриштирув ишларини давом эттирмоқда.
