Тошкент вилоятида 10 кг кумушни ноқонуний сотмоқчи бўлган шахс ушланди
Мусодара қилинган кумушнинг умумий қиймати 235 миллион 229 минг сўмни ташкил этади.
Тошкент вилоятининг Зангиота туманида қимматбаҳо металларнинг ноқонуний муомаласига чек қўйилди. Бу ҳақда Давлат хавфсизлик хизмати Zamon.uz'га маълум қилди.
Қайд этилишича, ДХХ, Иқтисодий жиноятларга қарши курашиш департаменти ҳамда Божхона органлари ҳамкорлигида ўтказилган тезкор тадбир давомида Тошкент шаҳрида яшовчи, 1992 йилда туғилган фуқаро 13 дона қуйма бўлакдан иборат жами 10 килограмм 35 грамм кумушни 20,8 минг АҚШ долларига сотаётган вақтида ашёвий далиллар билан қўлга олинган.
Мутахассислар хулосасига кўра, мусодара қилинган кумушнинг умумий қиймати 235 миллион 229 минг сўмни ташкил этади.
Терговга қадар текширув жараёнида ушбу фуқаро заргарлик буюмлари ишлаб чиқариш билан шуғулланувчи МЧЖ ходими экани аниқланган. Корхонада олтин ва кумуш маҳсулотларига қайта ишлов берилгани, бироқ қимматбаҳо металларни аффинаж қилиш фаолиятини амалга ошириш учун тегишли рухсат мавжуд эмаслиги маълум бўлган.
Шунингдек, текширув давомида ушбу манзилда умумий қиймати 3 миллиард 483 миллион сўмлик 58 килограмм кумуш ҳамда 2,2 килограмм олтин сақланаётгани аниқланган.
Ҳозирда мазкур ҳолат юзасидан жиноят иши қўзғатилиб, тергов ҳаракатлари олиб борилмоқда.
