Тошкентдаги “Чинор” метро бекати 50 кунга ёпилади
Бекатда реконструкция ишлари олиб борилиб, лифт ва янги турникетлар ўрнатилади.
Тошкент метрополитенининг “Чинор” метро бекатида йўловчилар учун янада қулай ва замонавий инфратузилма яратиш мақсадида реконструкция ишлари амалга оширилади. Бу ҳақда “Тошкент метрополитени” ахборот хизмати маълум қилди.
Маълум қилинишича, лойиҳа Ўзбекистон Республикаси Вазирлар Маҳкамасида 2026 йил 30 апрел куни ўтказилган 25-сон йиғилиш баённомаси ижроси доирасида амалга оширилмоқда.
Реконструкция доирасида бекатнинг кириш ва чиқиш қисмлари кенгайтирилади, ёши улуғ фуқаролар, ногиронлиги бўлган шахслар ҳамда болали оилалар учун 4 та катта сиғимли замонавий лифт ўрнатилади. Шунингдек, йўловчиларга хизмат кўрсатиш сифатини ошириш мақсадида қўшимча 12 та турникет ўрнатилиши режалаштирилган.
Шу муносабат билан, жорий йилнинг 13 июнидан бошлаб “Чинор” метро бекати 50 кун муддатга вақтинча йўловчилар учун ёпилади.
Йўловчиларга қулайлик яратиш мақсадида “Чинор” ва “Янгиҳаёт” метро бекатлари ўртасида махсус метробуслар қатнови йўлга қўйилади. Метробуслар белгиланган жадвал асосида ҳаракатланиб, йўловчиларнинг манзилларига ўз вақтида етиб боришига хизмат қилади.
“Тошкент метрополитени” юзага келиши мумкин бўлган вақтинчалик ноқулайликлар учун узр сўраб, амалга оширилаётган ишлар метро инфратузилмасини янада такомиллаштириш ва йўловчилар учун замонавий шароитлар яратишга қаратилганини таъкидлади.
