Украина дронлар билан Россия тарих музейига зарба берди
Ҳозирча қурбонлар ҳақида расмий маълумот берилмаган.
Украина дронлари Россия назорати остидаги Қримнинг Севостопол шаҳридаги тарихий музейга зарба берди. Ҳозирча қурбонлар ҳақида расмий маълумот берилмаган. Бу ҳақида Reuters хабар қилди.
Қайд этилишича, Қрим маъмурияти дрон ҳужумлари сабаб тунги поездлар жадвалига ўзгартиришлар киритган. Бу қарор бир неча кун аввал дрон зарбаси оқибатида поезд машинисти ёрдамчиси ҳалок бўлганидан кейин қабул қилинган.
10 июн куни эрталаб Севастопол ҳудудида ҳаво ҳужуми ҳақида огоҳлантириш эълон қилинган. Россия Мудофаа вазирлиги Россия ҳудудлари, шунингдек, Қора денгиз ва аннекция қилинган Қрим устида 326 та Украина дронлари йўқ қилинганини хабар қилган.
Севостопол губернатори Михаил Развожаев музейнинг том қисми ёнганини маълум қилган. Унга кўра, ёнғинни ўчириш учун 80 дан ортиқ одам ва 22 та техника жалб қилинган.
“Ваҳшийлар биз учун қадрли нарсаларга ҳужум қилиб, тарихимизни йўқ қилишга ҳаракат қилмоқда. Бизни бу билан қўрқитиб бўлмайди. Сизлар фақат бутун дунёга ўз ёмон тарафингизни кўрсатяпсиз”, дея ёзган Михаил Развожаев ўзининг Телеграм каналида.
Маълумот учун, музей 1853-1856 йиллардаги Қрим урушига бағишланган. Мазкур урушда Россия империяси Усмонли империяси, Буюк Британия, Франсия ва Сардиния қироллигидан иборат коалицияга қарши жанг қилиб, мағлуб бўлган.
