Ўзбекистонда Жанубий Кореяга иш ва ўқишга юборишни ваъда қилган фирибгарлар ушланди

 

Ўзбекистонда фуқароларни Жанубий Кореяга ишга ва ўқишга юборишни ваъда қилиб, улардан пул ундириш билан шуғулланган бир неча шахслар қўлга олинди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти маълум қилди.

 

Қайд этилишича, тезкор тадбирлар Қорақалпоғистон Республикаси, Фарғона, Самарқанд, Андижон, Сирдарё ва Навоий вилоятларида ўтказилган.

 

Хусусан, Хўжайли туманида фуқаро А. Р. гўёки юқори лавозимли танишлари орқали бир фуқарони 10 250 АҚШ доллари эвазига Жанубий Кореяга ишга юборишини ваъда қилиб, келишилган маблағнинг 5 минг долларини олаётган вақтида ушланган.

 

Фарғона вилоятида эса муқаддам судланган фуқаро Д. Р. 10 нафар фуқарони 55 минг АҚШ доллари эвазига Кореяга ўқиш ва ишга юборишни ваъда қилиб, 4 минг доллар олган вақтида қўлга олинди. Терговга қадар текширув давомида унинг яна 46 нафар фуқародан жами 196 минг 650 АҚШ долларини фирибгарлик йўли билан қўлга киритгани аниқланган.

 

Самарқанд вилоятида фуқаро Ж. Х. икки нафар фуқарога Корея учун ишчи визаси расмийлаштириб беришни ваъда қилиб, 12 минг доллар эвазига келишилган маблағнинг 3 минг долларини олаётган вақтда ушланган.

 

Андижон вилоятининг Олтинкўл туманида фуқаро М. О. бир фуқарога Кореяга кетиш учун ишчи виза олиб беришни ваъда қилиб, 6 минг доллардан 3 минг долларини олаётган вақтида қўлга олинган.

 

Сирдарё вилоятида фуқаро Н. Т. миграция тизимида ишловчи танишлари орқали фуқарони Кореяга ишга юборишни ваъда қилиб, 1 900 АҚШ доллари ҳамда 1,2 миллион сўм олаётган вақтида ушланди. Яна бир ҳолатда эса муқаддам судланган фуқаро Ш. Б. спорт визаси орқали Кореяга ишга юборишни ваъда қилиб, 1 300 АҚШ доллари ва 2,4 миллион сўм олаётган вақтида қўлга олинган.

 

Навоий вилоятининг Конимех туманида фуқаро А. И. миграция тизимидаги танишлари орқали фуқарони Кореяга ишга юборишни ваъда қилиб, 1 минг АҚШ доллари олган вақтида ушланган.

 

Шунингдек, Фарғона вилоятида фуқаро A.T. икки нафар фуқарони 9 600 АҚШ доллари эвазига Кореяга ўқишга юборишни ваъда қилган. Тезкор тадбир давомида ушбу маблағнинг 600 АҚШ доллари олдиндан олинган вақтида ҳолат фош этилган.

 

Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.