Ўзбекистонлик мухлисларнинг ярмидан кўпи АҚШ визасини ололмади
ЖЧ—2026 иштирокчи мамлакатларидан 11 тасида виза рад этиш даражаси 40 фоиздан юқори.
BBC хабарига кўра, 2026 йилги футбол бўйича Жаҳон чемпионати ўйинларини стадиондан бевосита томоша қилишни истаган кўплаб мамлакатлар фуқаролари, жумладан ўзбекистонлик мухлислар ҳам АҚШ ва бошқа мезбон давлатлар визасини олиш жараёнида жиддий тўсиқларга дуч келмоқда.
Таҳлилларга кўра, мундиалга йўл олган давлатлар фуқароларининг қарийб чорак қисмидан кўпроғи саёҳат чекловлари ёки виза рад этилиш ҳолатларига учрамоқда. Айрим ҳолатларда эса аризаларнинг катта қисми рад этилмоқда.
BBC қайд этишича, вазият АҚШда олиб борилаётган қатъий иммиграцион сиёсат ва саёҳат чекловлари билан янада мураккаблашган. Ушбу чекловлар рўйхатига турнирга йўлланма олган Гаити, Эрон, Сенегал ва Кот-дъИвуар каби давлатлар ҳам киритилган бўлиб, уларнинг фуқаролари учун АҚШ визасини олиш амалда жуда қийинлашган.
АҚШ Давлат департаменти маълумотларига кўра, Жаҳон чемпионати — 2026 иштирокчи мамлакатларидан 11 тасида виза рад этиш даражаси 40 фоиздан юқори. Ушбу рўйхатда Ўзбекистон билан бирга Эквадор, Миср, Жазоир, Иордания ҳамда бир қатор Африка давлатлари ҳам бор.
Шунга қарамай, ФИФА мухлислар учун виза жараёнини тезлаштириш мақсадида ФИФА Пасс тизимини жорий этган. Бироқ мутахассислар таъкидлашича, ушбу тизим виза берилишини кафолатламайди.
АҚШ расмийлари эса қатъий текширувларни миллий хавфсизликни таъминлаш ва визаси тугагандан сўнг мамлакатда ноқонуний қолиб кетиш ҳолатларининг олдини олиш билан изоҳламоқда.
Виза билан боғлиқ муаммолар фақат АҚШ билан чекланиб қолмаган. Турнир мезбонларидан бири бўлган Канада ва Мексикада ҳам иммиграцион тартиблар қатъий.
Хусусан, Мексиканинг Ўзбекистон, Ироқ, Кот-дъИвуар ва Сенегал каби саккизта иштирокчи давлатда дипломатик ваколатхонаси ёки элчихонаси йўқлиги мухлисларнинг ўйинларга бориш имкониятини сезиларли даражада чеклаб қўймоқда.
