АҚШ Эронга янги зарбалар берди
Теҳрон эса Баҳрайн ва Қувайтдаги АҚШ ҳарбий базаларига жавоб зарбалари берди.
АҚШ ва Эрон ўртасидаги кескинлик янада кучайди. АҚШ Марказий қўмондонлиги (CЕNTCОМ) Эрондаги бир қатор ҳарбий нишонларга қўшимча зарбалар берилганини маълум қилди дейди BBC.
Қўмондонлик баёнотига кўра, ҳужумлар АҚШ президенти кўрсатмаси асосида амалга оширилган бўлиб, улар Эроннинг давом этаётган ҳаракатларига жавоб сифатида изоҳланган. ОАВ хабарларида Эрондаги камида олти ҳудудда портлашлар кузатилгани қайд этилган.
Манбаларга кўра, зарбалар асосан мамлакат жанубидаги ҳаво ҳужумидан мудофаа тизимлари, радар мажмуалари ҳамда учувчисиз аппаратларни бошқариш инфратузилмаларига қаратилган.
Шундан сўнг CЕNTCОМ Эрондаги айрим обектларга нисбатан қўшимча ҳужумлар ҳам амалга оширилганини тасдиқлаган.
Эрон томони эса Баҳрайн ва Қувайтдаги АҚШ ҳарбий базаларига жавоб зарбалари берилганини маълум қилган. Эрон оммавий ахборот воситалари хабарларига кўра, ҳужумларда АҚШнинг бир қатор ҳарбий обектлари нишонга олинган.
Эслатиб ўтамиз, аввалроқ Эрон барча турдаги кемалар учун Ҳормуз бўғозини ёпгани хабар қилинган эди.
