Эрон музокараларни чўзаётгани учун бунинг нархини тўлайди — Трамп
АҚШ президенти Теҳроннинг ҳаракатларини танқид қилди ва янги огоҳлантириш берди.
Доналд Трамп Эронни музокара жараёнини чўзишда айблаб, бу ҳолат Теҳрон учун жиддий оқибатларга олиб келишини таъкидлади.
Ўзининг Truth Social ижтимоий тармоғидаги саҳифасида эълон қилган баёнотида Трамп Эрон келишувга эришиш имкониятидан ўз вақтида фойдаланмаганини қайд этган.
“Улар ўзлари учун жуда қулай бўлиши мумкин бўлган келишув юзасидан музокаралар олиб боришда ҳаддан ташқари кўп вақт йўқотди ва энди бунинг нархини тўлашларига тўғри келади”, — деган АҚШ президенти.
Шунингдек, Трамп Эрон қуролли кучларининг имкониятлари ҳақида ҳам фикр билдириб, мамлакатнинг ҳарбий салоҳияти сезиларли даражада заифлашганини таъкидлаган.
АҚШ Марказий қўмондонлиги аввалроқ Ҳормуз бўғози яқинида Апаче вертолёти билан боғлиқ ҳодисадан сўнг Эрон ҳудудидаги айрим ҳарбий обектларга зарбалар берилганини маълум қилган эди. Вашингтон маълумотларига кўра, ҳужумлар ҳаво мудофааси тизимлари, радар стансиялари ҳамда бошқарув инфратузилмасига қаратилган.
Теҳрон эса бунга жавобан Яқин Шарқдаги АҚШ ҳарбий обектларига қарши зарбалар уюштирганини билдирган.
