Самарқандда собиқ ИИБ ходимини ишга тиклашни ваъда қилиб, пул олган профилактика инспектори қўлга олинди
Шунингдек, Наманганда профилактика инспектори фуқаро устидан келиб тушган мурожаатни кўриб чиқмаганини айтиб, ундан 2 минг АҚШ доллари талаб қилган.
Самарқанд ва Наманган вилоятларида ички ишлар органлари ходимларининг коррупсион ҳаракатларига чек қўйилди. Бу ҳақда Давлат хавфсизлик хизмати Zamon.uz'га маълум қилди.
Қайд этилишича, ДХХнинг Навоий вилояти бўйича бошқармаси ҳамда Бош прокуратура ҳузуридаги Департамент ходимлари ҳамкорлигида ўтказилган тезкор тадбирда Самарқанд шаҳар ИИО ФМБ профилактика инспекторининг ноқонуний фаолияти фош этилган. У мансабдор танишлари орқали собиқ ички ишлар органи ходимини тизимга қайта ишга тиклашда ёрдам беришни ваъда қилиб, бунинг эвазига 7 минг АҚШ доллари олган вақтида ашёвий далиллар билан қўлга олинган.
Мазкур ҳолат юзасидан унга нисбатан Жиноят кодексининг 168-моддаси (фирибгарлик) ва 211-моддаси (пора бериш) билан жиноят иши қўзғатилиб, тергов ҳаракатлари олиб борилмоқда.
Шунингдек, Наманган вилоятининг Чуст туманида фаолият юритувчи профилактика инспекторининг ҳам ноқонуний ҳаракатлари аниқланган. У фуқаро устидан келиб тушган мурожаатни кўриб чиқмасдан қолдирганини рўкач қилиб, ундан 2 минг АҚШ доллари талаб қилган. Инспектор жорий йил феврал ойида ушбу маблағнинг 700 долларини олган.
Тергов материалларига кўра, у кейинчалик фуқародан қолган 1 300 долларни ҳамда келгусида чорва молларини Ўзбекистон–Қирғизистон давлат чегараси орқали ноқонуний олиб ўтишда кўмаклашиш эвазига яна 2 минг доллар талаб қилган. Натижада жами 3 300 АҚШ долларини олаётган вақтида ДХХ, Бош прокуратура ҳузуридаги Департамент ва ИИВ Шахсий хавфсизлик бош бошқармаси ходимлари томонидан қўлга олинган.
Мазкур ҳолат юзасидан профилактика инспекторига нисбатан Жиноят кодексининг 165-моддаси ва 168-моддаси билан жиноят иши қўзғатилиб, тергов ҳаракатлари давом эттирилмоқда.
