Месси, Роналду ва Ямал: ЖЧ-2026 да рекордлар янгиланиши мумкин

 

АҚШ, Канада ва Мексикада ўтказилаётган 2026 йилги футбол бўйича Жаҳон чемпионати мусобақа тарихидаги энг йирик турнир сифатида бир қатор рекордларнинг янгиланишига сабаб бўлиши мумкин.

 

Бу йил илк бор мундиалда 32 эмас, 48 та терма жамоа иштирок этмоқда. Натижада турнир доирасидаги ўйинлар сони ҳам сезиларли равишда ошиб, аввалги 64 та ўйин ўрнига 104 та учрашув ўтказилади.

 

Мусобақадаги ўйинлар сонининг кўпайиши урилган голлар бўйича ҳам янги рекорд қайд этилиши эҳтимолини оширмоқда. Ҳозирча энг юқори натижа 1998 ва 2014 йилги Жаҳон чемпионатларида қайд этилган 172 та гол ҳисобланади.

 

2026 йилги мундиал яна бир тарихий воқеа билан аҳамиятли. Турнир илк бор учта давлат — АҚШ, Канада ва Мексика мезбонлигида ўтказилмоқда. Шунингдек, Мексика Жаҳон чемпионати ўйинларига учинчи марта мезбонлик қилаётган илк мамлакатга айланди.

 

Турнирда иштирок этаётган Лионел Месси ва Криштиану Роналду ҳам тарихий рекорд ўрнатиш имкониятига эга. Улар футбол тарихида олтита Жаҳон чемпионатида қатнашган илк футболчиларга айланиши мумкин.

 

Месси, шунингдек, Жаҳон чемпионатларидаги ўйинлар сони бўйича ўз рекордини янада яхшилаши кутилмоқда. Аргентиналик футболчи ҳозирда мундиалларда ўтказган 26 та учрашув билан ушбу кўрсаткич бўйича етакчилик қилмоқда.

 

Бундан ташқари, Мбаппe ва Месси германиялик афсонавий ҳужумчи Мирослав Клосега тегишли Жаҳон чемпионатларидаги голлар рекорди — 16 та гол натижасига яқинлашиш имкониятига эга.

 

Яна бир эътибор марказидаги футболчи — Ламин Ямал. 18 ёшли футболчи мундиалнинг энг яхши ўйинчиси совринини қўлга киритса, ушбу мукофот тарихидаги энг ёш ғолибга айланиши мумкин.

 

Ҳозирда бу рекорд 1986 йилги Жаҳон чемпионатининг "Олтин тўп"ини 25 ёшида қўлга киритган Диего Марадонага тегишли.