Тошкентда хавфли ҳаракатланиб, бир нечта машинани пачоқлаб кетган Cobalt ўқ узиб тўхтатилди

 

Тошкент шаҳрида йўл ҳаракати қоидаларини қўпол равишда бузиб, бошқа ҳаракат иштирокчиларининг ҳаётига хавф туғдирган Cоbalt русумли автомобил ҳайдовчисининг ноқонуний ҳаракатларига чек қўйилди. Бу ҳақда Йўл ҳаракати хавфсизлик хизмати матбуот хизмати хабар берди.

 

Маълум қилинишича, 11 июн куни соат 21:34 лар атрофида 1982-йилда туғилган фуқаро руҳий-асаб касалликлари шифохонасида рўйхатда турувчи Р.Й. ўз бошқарувидаги Cоbalt автомашинасида Яккасарой туманидаги Шота Руставели кўчаси бўйлаб ҳаракатланиб, йўл ҳаракати қоидаларини бузган ҳолда бошқа фуқаролар ҳаётини хавф остига қўйган.

 

Ҳайдовчи ички ишлар органлари ходимларининг тўхташ ҳақидаги қонуний талабига бўйсунмасдан, ҳаракатни давом эттирган ҳамда бир нечта транспорт воситаларига техник шикаст етказган.

 

Кўрилган тезкор чоралар натижасида бошқа фуқароларга зарар етказилишининг олдини олиш мақсадида ички ишлар органлари ходимлари томонидан табелли қуролдан фойдаланилган. Огоҳлантириш берилгач, автомобил ғилдирагига ўқ узилиб, транспорт воситаси тўхтатилган ва ҳайдовчининг кейинги ноқонуний ҳаракатларига барҳам берилган.

 

Ҳозирда мазкур ҳолат юзасидан Тошкент шаҳар ИИББ томонидан терговга қадар текширув ишлари олиб борилмоқда.