Трамп Эронга режалаштирилган зарбалар бекор қилинганини маълум қилди
Зарба бериш режалари бекор қилинган бўлса-да, денгиз блокадаси ҳозирча сақланиб қолади.
АҚШ президенти Доналд Трамп Эронга қарши режалаштирилган ҳарбий зарбалар бекор қилинганини маълум қилди ҳамда Теҳрон билан келишув имзолаш имконияти сақланиб қолаётганини таъкидлади.
Трампнинг билдиришича, Эрон билан олиб борилган музокаралар мамлакат раҳбариятининг энг юқори даражасида кўриб чиқилган ва маъқулланган. Шу сабабли АҚШ томонидан режалаштирилган ҳужум ва бомбардимонлар тўхтатилган.
“Бугун кечқурун Эронга режалаштирилган ҳужумлар ва бомбардимонларни бекор қилдим”, — деб ёзган АҚШ президенти Truth Social ижтимоий тармоғидаги саҳифасида.
Унинг сўзларига кўра, музокаралар доирасида шакллантирилган якуний ёндашувлар томонлар томонидан қўллаб-қувватланган. Бироқ эҳтимолий келишувнинг мазмуни ва шартлари ҳозирча ошкор қилинмаган.
Трамп келишувни имзолаш санаси ва жойи яқин кунларда маълум қилинишини билдирган. Шу билан бирга, Эрон портларига нисбатан жорий этилган денгиз блокадаси якуний келишув расмийлаштирилгунига қадар сақланиб қолишини қайд этган.
АҚШ президенти мазкур баёнотни Эронга нисбатан “жуда қаттиқ зарба” берилиши мумкинлиги ҳамда мамлакатнинг асосий нефт инфратузилмаси устидан назорат ўрнатилиши ҳақида берган аввалги баёнотларидан бир неча соат ўтиб эълон қилган.
