Ўзбекистон–Колумбия ўйини учун 74 мингдан ортиқ чипта сотилди
18 июн куни бўлиб ўтадиган Ўзбекистон–Колумбия баҳсига қизиқиш рекорд даражага етди.
2026 йилги футбол бўйича Жаҳон чемпионатининг гуруҳ босқичидан ўрин олган Ўзбекистон ва Колумбия терма жамоалари ўртасидаги учрашув турнирнинг энг катта қизиқиш уйғотаётган ўйинларидан бирига айланди.
Дастлабки маълумотларга кўра, мазкур баҳс учун ҳозирга қадар 74 минг 725 та чипта сотилган. Бу кўрсаткич ЖЧ-2026 доирасида ўтказиладиган ўйинлар орасида энг юқори натижа сифатида қайд этилмоқда.
Шу тариқа, Ўзбекистон иштирокидаги учрашув чипта савдоси бўйича Мексика – Жанубий Африка ўртасидаги турнирнинг очилиш баҳси (73 373 та) ҳамда Бразилия – Марокаш учрашуви (73 719 та) натижаларидан ҳам ўзиб кетди.
Тарихий баҳс 18 июн куни Мексика пойтахтидаги афсонавий “Asteka” стадионида бўлиб ўтади. 81070 та томошабинга мўлжалланган арена ўринларининг қарийб 92 фоизи аллақачон банд қилинган.
Маълумотларга кўра, ўйинга бўлган юқори қизиқиш сабаб стадиондаги қолган чипталар ҳам тез орада сотиб бўлиниши кутилмоқда. Учрашув Тошкент вақти билан соат 07:00 да бошланади.
