Женевада АҚШ–Эрон келишуви имзоланиши кутилмоқда
Дипломатик манбаларга кўра, АҚШ ва Эрон ўртасидаги музокаралар ҳал қилувчи босқичга етган.
АҚШ ва Эрон ўртасида муҳим меморандум имзоланиши кутилмоқда. Ахиос нашри журналисти Барак Равиднинг хабардор манбага таяниб маълум қилишича, АҚШ Ҳарбий-ҳаво кучлари Швейтсариянинг Женева шаҳрига эҳтимолий имзолаш маросими учун зарур ускуналарни етказишни бошлаган.
Маълум қилинишича, агар меморандум имзоланиши бўйича якуний келишувга эришилса, маросимда АҚШ вице-президенти Ж.Д. Венс ҳам иштирок этиши мумкин.
Манбаларга кўра, АҚШ ва Эрон вакиллари ҳужжат матни юзасидан дастлабки келишувга эришган. Бироқ меморандум кучга кириши учун томонларнинг якуний розилиги ва расмий тасдиғи талаб этилади.
Аввалроқ АҚШ президенти Доналд Трамп Эрон билан можарони тугатишга қаратилган “катта келишув” тайёрланаётганини маълум қилган эди. Унинг таъкидлашича, ҳужжатлар деярли тайёр бўлиб, имзолаш маросими Европада ўтказилиши мумкин.
Шунингдек, Трамп музокаралар юқори босқичга чиққани сабабли Эронга қарши режалаштирилган ҳарбий зарбалар бекор қилинганини билдирган. Ҳозирча келишув юзасидан АҚШ ва Эрон томонидан якуний расмий баёнот берилмаган.
