АҚШ Фаластин футбол ассоциацияси президентига виза бермади
Жибрил Ражоуб FIFА томонидан Жаҳон чемпионатига таклиф этилган миллий футбол федерациялари раҳбарлари қаторидан жой олган, бироқ виза масаласи ҳал этилмаган.
Фаластин футбол ассоциацияси (ПФА) президенти Жибрил Ражоубга 2026 йилги футбол бўйича Жаҳон чемпионати доирасидаги тадбирларда иштирок этиш учун АҚШ визаси берилмагани маълум бўлди.
Associated Press хабарига кўра, Ражоуб FIFА томонидан Жаҳон чемпионатига таклиф этилган миллий футбол федерациялари раҳбарлари қаторидан жой олган. У мусобақа учун аккредитациядан ҳам ўтган, бироқ АҚШга кириш учун зарур бўлган виза масаласи ҳал этилмаган.
Ҳозирда Фаластин футбол ассоциацияси раҳбари Мексика пойтахти Мехико шаҳрида бўлиб турибди. У АҚШ визаси рад этилган ёки ҳали расмийлаштирилмаган федерация вакиллари орасида экани қайд этилган.
Жибрил Ражоуб футбол вакилларининг Жаҳон чемпионати ўйинларида иштирок этиш имкониятидан маҳрум этилишини адолацизлик деб баҳолаган.
АҚШ Давлат департаменти эса Ражоубнинг виза масаласи юзасидан изоҳ беришдан бош тортган.
Маълумот учун, Фаластин терма жамоаси 2026 йилги Жаҳон чемпионатига йўлланма олмаган бўлса-да, FIFА анъанавий равишда миллий футбол федерациялари раҳбарларини мусобақага таклиф қилади.
