Ғазода сулҳ эълон қилинганидан бери 983 киши ҳалок бўлди
2025 йил октябрда эълон қилинган сулҳга қарамай, Ғазода ҳарбий ҳаракатлар тўхтамаяпти. Сўнгги ҳужумлардан бирида бир киши ҳалок бўлди, умумий қурбонлар сони эса қарийб минг нафарга етди.
Исроил армияси Ғазо секторининг марказидаги Буреиж қочқинлар лагерига дрон ҳужуми уюштирди. Фаластиннинг WAFA ахборот агентлиги маълумотига кўра, ҳужум оқибатида бир киши ҳалок бўлган, яна икки киши жароҳатланган, дея ёзмоқда Al Jazeera.
Фаластин Ахборот Маркази қурбон маҳаллий муниципалитет ходими Муовия ал-Айдий эканини маълум қилди. Ғазо шаҳрининг Туффаҳ маҳалласида амалга оширилган алоҳида ҳужумда эса яна бир киши яраланган.
Ғазо Соғлиқни сақлаш вазирлиги маълумотларига кўра, сўнгги 48 соат ичида Исроил ҳужумлари оқибатида камида икки фаластинлик ҳалок бўлган, 11 киши жароҳат олган. Вазирлик ҳисоб-китобларига кўра, ўтган йил октябрь ойида сулҳ эълон қилинганидан буён Ғазода 983 киши ҳалок бўлган, 3 122 киши яраланган.
ҲАМАС Исроилни сулҳ шартларини мунтазам равишда бузишда айблади. Ҳаракат вакили Ҳазем Қосимнинг таъкидлашича, Исроилнинг давом этаётган ҳужумлари ва Ғазодаги назорат чизиқларини ўзгартиришга уринишлари музокаралар жараёнига путур етказмоқда.
Шу билан бирга, Исроил ҳарбийлари босиб олинган Ғарбий Соҳилда ҳам рейдларни давом эттирди. WAFA маълумотига кўра, Байтлаҳм яқинидаги бир неча ҳудудда ўтказилган амалиётлар вақтида кўплаб фаластинликлар жароҳатланган.
Хеврон яқинидаги Дума шаҳарчасида эса ногирон фаластинлик эркак ўқотар қуролдан яраланди. Ҳодиса юзасидан Фаластин ва Исроил томонлари турлича маълумот бермоқда.
Маҳаллий манбаларга кўра, исроиллик кўчманчилар Байтлаҳм ва бошқа аҳоли пунктлари яқинида фаластинликларга ҳужум қилган, мулкларга зарар етказган, айрим ҳудудларда йўлларни тўсиб қўйган ҳамда қишлоқ хўжалиги ерларига ўт қўйган.
