Ўзбекистонда кираётган йўловчи сумкасидан бўғма илон аниқланди
“Навоий” чегара божхона постида йўлбарссимон ноёб илон олиб кирилишининг олди олинди.
Тошкент вилоятидаги “Навоий” чегара божхона постида йўлбарссимон бўғма илонни Ўзбекистон ҳудудига ноқонуний олиб киришга уриниш фош этилди. Бу ҳақда вилоят божхона бошқармаси матбуот хизмати хабар берди.
Маълум қилинишича, қўшни давлатдан пиёда кириб келган фуқарога тегишли қўл сумкаси назорат-рентген ускунаси орқали текширилганида унинг ичида тирик жонивор — илон борлиги аниқланган.
Дастлабки маълумотларга кўра, аниқланган жонивор йўлбарс питони (йўлбарссимон бўғма илон) бўлиб, ушбу тур Жанубий ва Жануби-Шарқий Осиё ҳудудларида учрайди. Мазкур илон халқаро муҳофаза остидаги турлар сирасига киради ва уни мамлакат ҳудудига олиб кириш учун CИТЕС халқаро рухсатномаси талаб этилади.
Бироқ йўловчи божхона назорати давомида ушбу жониворни олиб кириш учун зарур бўлган рухсат этувчи ҳужжатларни тақдим эта олмаган.
Ҳозирда мазкур ҳолат юзасидан божхона органлари томонидан суриштирув ҳаракатлари олиб борилмоқда.
Аниқланган жонивор белгиланган тартибда Тошкент ҳайвонот боғига топширилган бўлиб, мутахассислар унинг ҳолатини қониқарли деб баҳоламоқда.
