Андижонда поликлиникадаги фожиада қутқарувчилар бепарволик қилдими?
ФВВ тарқалаётган хабарларга ойдинлик киритди.
Фавқулодда вазиятлар вазирлиги Марҳамат туманида қудуқда 4 нафар поликлиника ходими ҳалок бўлган ҳодиса вақтида қутқарувчилар гўёки бепарволик қилгани ҳақидаги хабарларни рад этди.
Ҳодиса 10 июнь куни туш пайтида Марҳамат тумани марказий поликлиникаси ҳудудида содир бўлган. Дастлаб техник ходимлардан бири хавфсизлик қоидаларига риоя қилмаган ҳолда насос моторини созлаш учун қудуққа тушган. Қудуқ ичида тўпланган заҳарли газлар сабаб у ҳушини йўқотган.
Шундан сўнг унга ёрдам беришга уринган яна уч нафар техник ходим ҳам бирин-кетин қудуққа тушган ва заҳарли газлардан заҳарланиб ҳалок бўлган.
ФВБга кўра, ҳодиса ҳақида хабар келиб тушиши билан Марҳамат тумани Фавқулодда вазиятлар бўлими қутқарувчилари воқеа жойига етиб борган. Туман бўлими раҳбарининг айтишича, қутқарувчилар келган пайтда қудуқ ичидаги тўрт нафар ходимда ҳаёт аломатлари бўлмаган. Бу ҳолат видеоёзув билан ҳам тасдиқланиши билдирилган.
Марҳумларнинг жасадларини қудуқдан олиб чиқиш учун Андижон вилояти Фавқулодда вазиятлар бошқармасининг радиацион-кимёвий муҳофазага ихтисослашган махсус бўлинмаси жалб этилган.
Бошқарма, шунингдек, қутқарувчилар воқеа жойига етиб келганида қудуқдаги одамлар тирик бўлгани ва ёрдам сўрагани, бироқ махсус ҳимоя воситалари йўқлиги сабаб уларга ёрдам кўрсатилмагани ҳақидаги хабарлар ҳақиқатга мос эмаслигини таъкидлади.
