Трамп Исроилнинг Ливанга қилган ҳужумини қоралади

АҚШ президенти Доналд Трамп Исроилнинг Байрут жанубига берган зарбаси Эрон билан тинчлик келишувига эришиш жараёнига салбий таъсир кўрсатиши мумкинлигини билдириб, ҳужум “бўлмаслиги керак эди” деди. Бу ҳақда Reuters хабар берди.

 

Шу билан бирга, Трамп Вашингтон ва Теҳрон ўртасидаги келишув деярли тайёр эканини таъкидлади.

 

“Биз минтақага, жумладан, Ливанга тинчлик олиб келадиган келишувга жуда яқинмиз. Барча томонлар тўхташи керак. Ливанда Исроилнинг бошқа ҳужумлари бўлмаслиги керак, лекин Ҳизбуллоҳ каби бошқа кучлар томонидан Исроилга қарши ҳужумлар ҳам бўлмаслиги керак. Бу узоқ ва гўзал тинчликнинг бошланиши бўлиши мумкин - келинг, бу имкониятни бузмайлик”, деди Трамп.

 

Трампнинг баёноти Исроилнинг Ливандаги “Ҳизбуллоҳ” нишонларига берган зарбаси ортидан янгради. Эрон расмийлари ушбу ҳужумни АҚШнинг ўз мажбуриятларини бажаришга қодир эмаслигининг белгиси сифатида баҳолади ва жавоб чоралари кўрилиши ҳақида огоҳлантирди.

 

Reuters манбаларига кўра, АҚШ ва Эрон ўртасида муҳокама қилинаётган келишув лойиҳаси музлатилган 25 миллиард долларлик Эрон активларини бўшатиш, нефть экспортига қўйилган айрим чекловларни юмшатиш ҳамда Ҳормуз бўғозини қайта очишни назарда тутади. Эвазига Теҳрон ядро қуроли яратмаслик ва ядро дастурини чеклаш бўйича мажбуриятлар олиши керак.

 

Бироқ Теҳрон ҳали ҳужжат бўйича якуний қарор қабул қилмаганини билдирган. Исроилнинг Ливандаги сўнгги ҳарбий амалиёти эса музокараларнинг истиқболи борасидаги ноаниқликларни янада кучайтирмоқда. Уруш ва дипломатик саъй-ҳаракатлар фонида минтақадаги кескинлик юқори даражада сақланиб қолмоқда.