Ўзбекистонда ишлаб чиқарилганига 30 йилдан ошган автомобиллар учун экологик тўлов жорий этилиши мумкин

Ўзбекистонда фойдаланиш муддати 30 йилдан ошган автомобиллар эгалари учун янги талаб жорий этилиши режалаштирилмоқда. 

 

Жамоатчилик муҳокамасига қўйилган ҳукумат қарори лойиҳасида бундай транспорт воситалари эгалари ҳар йили экологик компенсация тўлаши назарда тутилган.

 

Ҳужжатга кўра, 2027 йил 1 январдан бошлаб ишлаб чиқарилганига 30 йил ва ундан ортиқ вақт бўлган автомобиллар эгалари базавий ҳисоблаш миқдорининг 30 баравари миқдорида экологик тўловни амалга ошириши мумкин. Амалдаги БҲМдан келиб чиқилса, бу сумма 12,36 миллион сўмни ташкил этади.

 

Лойиҳада экологик талабларга жавоб бермайдиган транспорт воситаларидан фойдаланишни босқичма-босқич чеклаш ҳам кўзда тутилган. Жумладан, “зарарли” экологик тоифага кирувчи автомобилларни қайта рўйхатдан ўтказиш тақиқланиши ва улар давлат рўйхатидан чиқарилиши мумкин. Мазкур тартиб антиквар автомобилларга татбиқ этилмайди.

 

Шунингдек, мамлакатда эскирган транспорт воситаларини утилизация қилиш тизимини босқичма-босқич йўлга қўйиш режалаштирилмоқда. Дастлабки босқич 2026 йилдан енгил автомобилларни қамраб олса, 2027 йилдан автобуслар, микроавтобуслар ва юк автомобилларига ҳам татбиқ этилади. 2030 йилдан эса тизим барча турдаги ғилдиракли транспорт воситаларини ўз ичига олиши кўзда тутилган.

 

Лойиҳага мувофиқ, эскирган автомобилини утилизацияга топширган фуқароларга бир нечта кўринишда компенсация берилиши мумкин. Хусусан, уларга пул маблағлари тўлаб берилиши, янги автомобиль харид қилиш учун электрон ваучер тақдим этилиши ёки қонунчиликда белгиланган бошқа шакллардаги имтиёзлар берилиши назарда тутилган.

 

Электрон ваучер орқали янги автомобиль харид қилаётган фуқароларга ваучерда кўрсатилган миқдорда чегирма берилади. Қолган сумма эса бир йилдан ортиқ муддатга бўлиб-бўлиб тўлаш шарти билан расмийлаштирилиши мумкин.Қарор лойиҳаси бўйича жамоатчилик муҳокамаси 28 июнга қадар давом этади.