Ўзбекистонда кибержиноятчилар фуқароларнинг 2 трлн сўмдан ортиқ пулини талон-торож қилган — ИИВ
2025 йилда мамлакатда қайд этилган барча жиноятларнинг 49,6 фоизи кибержиноятлар ҳиссасига тўғри келган.
Ўзбекистонда кибержиноятлар оқибатида фуқароларнинг 2 триллион сўмдан ортиқ маблағи талон-торож қилинган. Бу ҳақда Ички ишлар вазирлиги Кибержиноятчиликка қарши кураш департаменти бошлиғи Мирзохон Зубайдуллаев Сенатнинг 13 июнь кунги ялпи мажлисида маълум қилди.
Унинг сўзларига кўра, 2025 йилда мамлакатда қайд этилган барча жиноятларнинг 49,6 фоизи кибержиноятлар ҳиссасига тўғри келган. Мазкур турдаги жиноятлар сони 2021 йилдан буён изчил ўсиб бормоқда.
Таъкидланишича, кибержиноятларни содир этиш усуллари ҳам мураккаблашиб бормоқда. Сўнгги йилларда уларнинг турлари 18 тадан 64 тага етган. Ҳолатларнинг 96 фоизида электрон тўлов тизимлари орқали киберўғирлик ва киберфирибгарлик содир этилган.
Сенат мажлисида Марказий банк, Ички ишлар вазирлиги ва Бош прокуратура кибержиноятларга қарши курашиш бўйича ҳамкорликда махсус тизимни йўлга қўйгани маълум қилинди. Ушбу тизим орқали фуқаролар мурожаатидан сўнг 24 соат ичида банк карталарини блоклаш ва пул маблағлари ҳаракатини тўхтатиш имконияти яратилган.
Вазирлик вакилига кўра, сўнгги беш ой давомида 1,7 триллион сўм маблағнинг ноқонуний равишда хорижга олиб чиқиб кетилишининг олди олинган. Шунингдек, жиноятларга алоқадор бўлган 10 минг 250 та банк картаси блокланган.
Мирзохон Зубайдуллаевнинг билдиришича, 2026 йилда кибержиноятларни фош этиш кўрсаткичлари 3,5 баробарга, уларни аниқлаш ишлари эса 5 баробарга яхшиланган.
