ЖЧ — 2026. Қатар Швейцариядан очко тортиб олди, Бразилияда дуранг, Шотландия ва Австралияда ғалаба

АҚШ, Канада ва Мексика мезбонлик қилаётган 2026 йилги Жаҳон чемпионатида биринчи тур учрашувлари давом этмоқда. 

 

2026-йил 14 июнь куни тонгда мусобақанинг “B”, “C” ва “D” гуруҳларидан ўрин олган 4 учрашув якунига етди.

 

Дастлабки баҳсда Қатар терма жамоаси Швейцарияга қарши майдонга чиқиб, ҳакам томонидан қўшиб берилган дақиқаларда ҳисобни тенглаштириб қолди ва мундиаллар тарихидаги илк очкосини қўлга киритди. Ўйиннинг 17 дақиқасида Эмболо пеналтидан европаликларни ҳисобда олдинга олиб чиққан бўлса, 90+6-дақиқада Буалем Хухи ҳисобдаги мувозанатни тиклади, 1:1. Мазкур баҳсдан сўнг “B” гуруҳида барча жамоалар 1 очкодан бўлишиб турибди. 

 

Кеча бўлиб ўтган Канада — Босния ва Герсеговина жамоалари ҳам муроса йўлини танлаганди.Турнир 1-турининг марказий ўйини дея эътироф этилган Бразилия — Марокаш учрашуви ҳам 1:1 ҳисобида якун топди. Ушбу баҳснинг 21-дақиқасида Исмоил Сайбари марокашликларнинг голига муаллифлик қилган бўлса, 32-дақиқада Винисиус Жуниор ажойиб ҳаракат қилиб, Яссин Буну қўриқлаётган Марокаш дарвозасини ишғол қилди. Шундан сўнг ўйинда бошқа гол киритилмади, 1:1. 

 

“C” гуруҳидан ўрин олган яна бир баҳсда Шотландия терма жамоаси Жон Макгиннинг 28-дақиқада киритган ягона голи эвазига Гаити терма жамоасини мағлуб этди ва 3 очко билан гуруҳнинг яққол пешқадамига айланиб олди. 

 

“D” гуруҳида эса кичик сенсация қайд этилди. Роберто Манчини бошчилигидаги Туркия терма жамоаси Австралияга қарши баҳсда устунлик қилиб ўйнаган бўлса ҳам якунда 0:2 ҳисобида “кенгуру”ларга имкониятни бой бериб қўйди. Учрашувнинг 27-дақиқасида Иранкунда қарши ҳужумда рақибни жазолаган бўлса, 75-дақиқага келиб Коннор Меткалф ҳисобни ишончли кўринишга келтириб қўйди. 

 

Шу тариқа “D” гуруҳида мусобақа мезбонларидан бири, илк турда Парагвайни йирик ҳисобда мағлуб этган АҚШ ҳамда Австралия 3 очкодан жамғариб пешқадамлик қилмоқда.