Албания президенти 16–17 июн кунлари расмий ташриф билан Ўзбекистонда бўлади
Ташриф дастури доирасида Байрам Бегай V Тошкент халқаро инвестиция форумида ҳам иштирок этади.
Шавкат Мирзиёевнинг таклифига биноан Байрам Бегай 16–17 июн кунлари рафиқаси ҳамроҳлигида расмий ташриф билан Ўзбекистонда бўлади.
Ташриф доирасида Тошкент шаҳрида олий даражадаги музокаралар ўтказилиши режалаштирилган. Унда Ўзбекистон ва Албания ўртасидаги икки томонлама ҳамкорликни янада ривожлантириш истиқболлари муҳокама қилинади.
Музокараларда савдо-иқтисодий алоқалар, саноат кооперацияси, қишлоқ хўжалиги, “яшил” энергетика, туризм ҳамда бошқа устувор йўналишлардаги ҳамкорликни кенгайтириш масалаларига алоҳида эътибор қаратилади. Шунингдек, маданий-гуманитар алмашинувларни фаоллаштириш бўйича таклифлар ҳам кўриб чиқилади.
Томонлар халқаро ва минтақавий аҳамиятга эга долзарб масалалар юзасидан фикр алмашиб, кўп томонлама платформалар доирасидаги ҳамкорлик ва ўзаро қўллаб-қувватлаш истиқболларини муҳокама қиладилар.
Ташриф дастурига мувофиқ, Албания Президенти V Тошкент халқаро инвестиция форумида ҳам иштирок этади.
