Бўстонлиқда қўл тормози тортилмаган Captiva каналга тушиб кетди
ФВВ қутқарувчилари автомобилни сувдан чиқариб олган. Жабрланганлар йўқлиги билдирилди.
Тошкент вилоятининг Бўстонлиқ туманида Captiva русумли автомобиль каналга тушиб кетди. Бу ҳақда ФВВ хабар берди.
Вилоят Фавқулодда вазиятлар бошқармаси маълумотига кўра, ҳодиса 14 июнь куни Қоронқул маҳалласи ҳудудидан оқиб ўтувчи Қоронқул каналида содир бўлган.
Аниқланишича, ҳайдовчи автомобилни тўхтатгач, қўл тормозини тортиб қўйишни унутган. Шундан сўнг машина ўз-ўзидан ҳаракатланиб, каналга тушиб кетган.
Воқеа жойига етиб борган қутқарувчилар махсус техника ёрдамида автомобилни сувдан чиқариб олган.
Ҳодиса оқибатида жабрланганлар бўлмаган.
