Наманган шаҳрида реновация доирасида 36 та кўп қаватли уй бузилади
Дастур доирасида уйлар бузилиб, 92 та янги кўп қаватли уй ва юзлаб хизмат кўрсатиш объектлари қурилади.
Президент қарори билан 2026–2030 йилларда Наманган шаҳрида реновация дастури амалга ошириладиган ҳудудлар тасдиқланди.
Ҳужжатга кўра, реновация ишлари Навоий, Ибрат ва Уйчи кўчаларида олиб борилади. Ушбу ҳудудларда 36 та кўп қаватли уй, 143 та якка тартибдаги хонадон ҳамда 13 та нотурар объект бузилиши режалаштирилган.
Дастур доирасида жами 6 616 та хонадонга мўлжалланган 92 та кўп қаватли уй қурилади.
Шунингдек, 375 та хизмат кўрсатиш объектини ташкил этиш кўзда тутилган.
Инфратузилмани яхшилаш мақсадида шаҳарда 2,3 километр асосий йўл ва 56 минг квадрат метрдан ортиқ ички йўллар таъмирланади. Бундан ташқари, 6,9 километр электр тармоқлари янгиланиб, 45 та трансформатор ҳамда 2 та янги қозонхона ўрнатилади. Сув таъминоти тизимини яхшилаш ишлари ҳам амалга оширилади.
10 июнь куни Президент томонидан “Шаҳарсозлик реновацияси тўғрисида”ги қонун имзоланган эди. Қонунга кўра, реновация ҳудудидаги турар ва нотурар жойларнинг эскиргани, яшаш ёки фойдаланиш учун яроқсиз ҳолга келгани, авария хавфи мавжудлиги ҳамда ҳудуд аҳолисининг ижтимоий ҳаётига жиддий таъсир қилувчи омиллар реновацияни амалга ошириш учун асос бўлиб хизмат қилади.
