Шавкат Мирзиёев Си Цзиньпинни таваллуд куни билан табриклади
Мактубда икки давлат ўртасидаги дўстлик, ўзаро ишонч ва “Бир макон — бир йўл” доирасидаги ҳамкорлик юксак баҳоланди.
Шавкат Мирзиёев Си Цзиньпинга таваллуд куни муносабати билан табрик йўллади. Бу ҳақда Президент матбуот котиби маълум қилди.
Мактубда Си Цзиньпин Хитой Халқ Республикаси ва Хитой Коммунистик партиясининг етакчи сиёсий арбоби сифатида Ватан ва халқ фаровонлиги йўлида катта масъулият ва стратегик тафаккур билан мамлакатни янги тараққиёт босқичларига олиб чиқаётгани таъкидланган.
Шунингдек, Хитой модернизацияси изчил давом этаётгани, миллий юксалиш сари йўналтирилган сиёсат мамлакат тарихида муҳим ўрин эгаллаётгани қайд этилган.
Ўзбекистон ва Хитой ўртасидаги муносабатлар бугунги кунда юксак даражага кўтарилгани, икки давлат ўртасидаги стратегик шериклик, ўзаро ишонч ва дўстлик алоқалари изчил ривожланиб бораётгани алоҳида қайд этилган.
Президент, шунингдек, “Бир макон — бир йўл” ташаббуси доирасидаги ҳамкорлик самарали натижалар бераётганини ва барча келишувларни тўлиқ амалга ошириш икки томонлама муносабатларни янги сифат босқичига олиб чиқишига ишонч билдирган.
Табрик якунида давлат раҳбари Си Цзиньпинга мустаҳкам соғлиқ, оилавий бахт ва масъулиятли фаолиятида муваффақиятлар, Хитой халқига эса тинчлик ва барқарор тараққиёт тилаган.
