Олимлар Эбола вирусининг Европага тарқалиш хавфини 92 фоиз деб баҳолади

Япониялик олимлар Эбола вирусининг Конго Демократик Республикаси ва Угандадан халқаро авиақатновлар орқали бошқа мамлакатларга кириб келиш хавфини баҳолади. Бу ҳақда РИА Новости хабар берди.

 

Тадқиқот натижаларига кўра, вируснинг авиация орқали кириб келиш эҳтимоли энг юқори давлат Белгия бўлиб чиқди.

 

Тадқиқот муаллифлари — Япония Миллий юқумли касалликлар институти ҳамда Токио университети мутахассислари — инфекциянинг халқаро авиақатновлар орқали эҳтимолий тарқалишини моделлаштирган. 

 

Ҳисоб-китоблар 2024 йил май ойидаги йўловчи оқимлари ҳақидаги маълумотларга асосланган бўлиб, улар 11 264 та аэропорт, 569 741 та авиамаршрут ва 329 миллиондан ортиқ йўловчини қамраб олган. Тадқиқотчилар бошланғич нуқта сифатида Киншасадаги Нджили халқаро аэропортини танлаган. 

 

Шундан сўнг бошқа аэропортларгача бўлган “самарали масофа” ҳисоблаб чиқилган. Мазкур кўрсаткич географик масофани эмас, балки авиақатновлар, йўловчи оқимлари ва транзит қатновлар орқали ўзаро боғлиқлик даражасини ифодалайди.

 

Олинган маълумотлар асосида олимлар 30 кун ичида камида битта Эбола билан касалланган шахснинг авиация орқали мамлакатга кириб келиш эҳтимолини баҳолаган.

 

Натижаларга кўра, энг юқори хавф Белгияда қайд этилган — 77,7 фоиз. Францияда бу кўрсаткич 77,5 фоизни, Жанубий Африка Республикасида эса 75,3 фоизни ташкил қилган. Моделнинг юқори чегараси бўйича ҳисобланганда эса Белгияда хавф 92 фоизга, Францияда 91,9 фоизга ва ЖАРда 90,5 фоизга етган.

 

Хавф даражаси юқори бўлган давлатлар ўнталигига Кения, БАА, Туркия, Уганда, Ҳиндистон, Кот-дъИвуар ва Канада ҳам кирган. Туркияда кўрсаткич 69,8 фоизни, моделнинг юқори чегараси бўйича эса 86,7 фоизни ташкил этган. Канадада эса бу кўрсаткичлар мос равишда 64,2 ва 82,3 фоиз бўлган.

 

Тадқиқот муаллифлари ушбу баҳолар инфекциянинг мамлакатга кириб келиш хавфини англатишини, бироқ вирус кириб келганидан кейин унинг маҳаллий миқёсда тарқалиш хавфини акс эттирмаслигини таъкидлаган.

 

Бундибугё штаммига мансуб Эбола иситмаси май ойи ўрталарида Конго Демократик Республикаси ва Угандада қайд этилган. Шундан сўнг Жаҳон соғлиқни сақлаш ташкилоти вазиятни бошқа давлатлар учун хавф туғдирувчи фавқулодда ҳолат деб баҳолаган ҳамда вируснинг минтақавий тарқалиш хавфини юқори даражада деб эълон қилган.

 

Сўнгги маълумотларга кўра, Конгода Эбола билан касалланишнинг тасдиқланган ҳолатлари сони 800 тадан ошган. Улардан камида 192 таси ўлим билан якунланган.