Тошкентда 9-синф битирувчиси бошқарган BYD автобусга урилди
У автомобилнинг давлат рақамини ечган ҳолда ҳаракатланган.
Тошкент шаҳрида 9-синфни битирган ўсмир бошқарган BYD русумли автомобиль йўл-транспорт ҳодисасига учради. Бу ҳақда ИИВ Йўл ҳаракати хавфсизлиги хизмати маълум қилди.
Қайд этилишича, ҳодиса 15 июнь куни эрталаб содир бўлган. Тошкентдаги 64-мактабнинг 9-синфини битирган икки нафар синфдош давлат рақами ечиб қўйилган BYD автомобилида йўлга чиққан.
Ҳайдовчилик ҳуқуқига эга бўлмаган ўсмир транспорт воситаси бошқарувини йўқотиб, Yu русумли йўловчи автобусининг орқа қисмига урилган.
ЙҲХХ маълумотига кўра, ҳодиса вақтида автобусда йўловчилар бўлмаган ва ЙТҲ оқибатида ҳеч ким тан жароҳати олмаган.
Ўсмирнинг отаси фарзанди эрталаб оила аъзоларининг рухсатисиз уйга тегишли автомобилни олиб чиқиб кетганини билдирган.
Ҳолат юзасидан транспорт воситасини ҳужжатсиз бошқаришга йўл қўйганлиги учун ўсмирнинг отасига нисбатан маъмурий баённома расмийлаштирилган.
