Тошкентда чанг-тўзон кузатилиши мумкин — Махсус комиссия огоҳлантирди
Шамол 12–15 м/с гача кучайиши, айрим ҳудудларда ёмғир ёғиши кутилмоқда.
Жаҳон метеорология ташкилотининг Чанг-қум бўронлари бўйича Пекин минтақавий маркази ҳамда Гидрометеорология хизмати агентлиги прогнозларига кўра, бугун Тошкент шаҳрида нам ҳаво массалари кириб келиши арафасида қисқа муддатли чанг-тўзон ҳодисалари кузатилиши мумкин.
Маълум қилинишича, кун давомида об-ҳаво ўзгарувчан бўлиб, айрим ҳудудларда қисқа муддатли ёмғир ва момақалдироқ кузатилиши эҳтимоли мавжуд. Шамол тезлиги 3–8 метр/сонияни ташкил этади, айрим жойларда эса 12–15 метр/сониягача кучайиши мумкин. Кучли шамол таъсирида айрим ҳудудларда чанг-тўзонлар юзага келиши кутилмоқда.
Мутахассисларнинг қайд этишича, мазкур ҳолат туфайли атмосфера ҳавосида чанг заррачалари, хусусан PМ10 кўрсаткичлари қисқа муддатга ортиши мумкин. Бироқ ёғингарчиликлар ҳисобига куннинг иккинчи ярмида ҳаво сифати аста-секин яхшиланиши прогноз қилинмоқда.
Шу муносабат билан нафас йўллари касалликлари, аллергия ҳамда юрак-қон томир тизими билан боғлиқ муаммолари мавжуд фуқароларга эҳтиёт чораларини кўриш тавсия этилди. Зарурат бўлмаганда узоқ вақт очиқ ҳавода бўлмаслик, дераза ва эшикларни ёпиқ сақлаш ҳамда ҳимоя ниқобларидан фойдаланиш тавсия қилинмоқда.
Ҳозирда атмосфера ҳавоси ҳолати Махсус комиссия томонидан доимий назорат ва мониторинг остига олинган.
