Тошкентда Lacetti ва BYD тўқнашуви оқибатида уч киши ҳалок бўлди
Lacetti ҳайдовчиси чорраҳада кескин чапга бурилиб, қарама-қарши йўналишдаги автомобиль билан тўқнашган. БЙДъни вояга етмаган шахс бошқарган.
Тошкент шаҳрининг Учтепа туманида Lacetti ва BYD автомобиллари иштирокида содир бўлган йўл-транспорт ҳодисаси оқибатида уч киши вафот этди. Бу ҳақда “Мillar” дастурида маълум қилинди.
Қайд этилишича, ҳодиса 16 июнь куни соат 03:10 атрофида Тошкент ҳалқа автомобиль йўлининг Учтепа туманидаги чорраҳасида юз берган.
Дастлабки маълумотларга кўра, 2002 йилда туғилган ҳайдовчи бошқарувидаги Lacetti автомобили чорраҳада кескин чапга бурилган. Шу вақтда қарама-қарши йўналишда ҳаракатланиб келаётган BYD автомобили билан тўқнашув содир бўлган.
Аниқланишича, BYD автомобилини 2010 йилда туғилган, ҳайдовчилик гувоҳномасига эга бўлмаган вояга етмаган шахс бошқарган.
ЙТҲ оқибатида Lacetti ҳайдовчиси ҳамда 1999 ва 2004 йилларда туғилган икки нафар йўловчи оғир тан жароҳатлари олиб, воқеа жойида вафот этган.
Воқеа жойидан олинган тасвирларда зарба кучли бўлгани ва йўл бўйлаб автомобиль қисмлари сочилиб кетгани акс этган. Гувоҳларнинг айтишича, тўқнашув оқибатида йўл четидаги бекат конструкциясига ҳам шикаст етган.
Мазкур ҳолат юзасидан Тошкент шаҳар ИИББ Тергов бошқармаси томонидан Жиноят кодексининг 266-моддаси 2-қисми (транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган.
Ҳозирда ҳодисанинг барча тафсилотларини аниқлаш юзасидан тергов ҳаракатлари олиб борилмоқда.
