Тошкентда жиноят ишларини “ҳал қилиб бериш”ни ваъда қилган ИИО ходимига жиноят иши очилди
У ресторандаги ёнғин оқибатида ишчи жароҳат олган ҳолат юзасидан қўзғатилган жиноят ишини тугатиб бериш учун пул талаб қилган.
Коррупцияга қарши курашиш йўналишида Давлат хавфсизлик хизмати, Ички ишлар вазирлиги Шахсий хавфсизлик бош бошқармаси ҳамда Тошкент шаҳар прокуратураси ҳамкорлигида ўтказилган тезкор тадбирда ички ишлар органлари мансабдор шахсининг ноқонуний ҳаракатларига чек қўйилди. Бу ҳақда ДХХ Zamon.uz'гa хабар берди.
Аниқланишича, Шайхонтоҳур тумани ИИО ФМБ ТҚХ Жиноят қидирув бўлими бўлинма бошлиғи ўзининг мансабдор танишлари орқали тадбиркорлик фаолияти билан шуғулланувчи фуқарога нисбатан Жиноят кодексининг 168-моддаси (фирибгарлик) билан қўзғатилган жиноят ишини ижобий ҳал қилиб беришни ваъда қилган.
Шунингдек, у тадбиркорга тегишли ресторанда содир бўлган ёнғин оқибатида бир ишчининг куйиш жароҳати олгани юзасидан қўзғатилган жиноят ишини тугатиб бериш эвазига ҳам пул талаб қилган.
Мансабдор шахс мазкур масалаларни ҳал этиб бериш учун жами 7 минг 500 АҚШ доллари сўраган. Тезкор тадбир давомида у олдиндан 2 минг 500 АҚШ долларини олган вақтида ашёвий далиллар билан қўлга олинган.
Ҳозирда мазкур ҳолат юзасидан жиноят иши қўзғатилиб, тергов ҳаракатлари олиб борилмоқда.
