Бир кунда 281 минг мухлис: ЖЧ-2026 рекорд даражадаги ташрифни қайд этди
Шимолий Америкада ўтказилган гуруҳ босқичи ўйинларини бир куннинг ўзида 281 минг мухлис стадионлардан кузатган.
Халқаро футбол ассоциациялари федерацияси (FIFA) 16 июнь куни 2026 йилги футбол бўйича Жаҳон чемпионатида тарихий ташриф рекорди қайд этилганини маълум қилди.
Ташкилот маълумотларига кўра, Шимолий Америкада ўтказилган гуруҳ босқичи ўйинларини бир куннинг ўзида 281 минг нафар томошабин стадионлардан туриб кузатган. Бу Жаҳон чемпионатлари тарихидаги энг юқори бир кунлик ташриф кўрсаткичи сифатида қайд этилган.
Рекорд турнирнинг олтинчи куни ўтказилган учрашувлар вақтида ўрнатилган. Жумладан, Канзас-Ситида Аргентина Жазоирни 3:0 ҳисобида мағлуб этган, Фоксборода Норвегия Ироқ устидан 4:1 ҳисобида ғалаба қозонган, Шарқий Резерфордда Франция Сенегални 3:1 ҳисобида таслим этган, яна бир учрашувда Австрия Иорданияни 3:1 ҳисобида мағлубиятга учратган.
FIFA рекорд даражадаги томошабинлар сонини футболнинг дунё халқларини бирлаштирувчи кучи билан изоҳлаб, мухлисларга стадионлардаги муҳит ва қўллаб-қувватлов учун миннатдорлик билдирган.
Шунингдек, ташкилот 11–15 июнь кунлари орасида ўтказилган дастлабки беш кун давомида ўйинларга жами 1 миллиондан ортиқ мухлис ташриф буюрганини маълум қилган эди. Шу боис, 1994 йилда АҚШ мезбонлик қилган мундиалда ўрнатилган 3,59 миллион томошабинлик рекорд янгиланиши мумкинлиги қайд этилмоқда.
Маълумот учун, 2026 йилги Жаҳон чемпионати тарихда илк бор уч давлат — АҚШ, Канада ва Мексика мезбонлигида, 48 та миллий терма жамоа иштирокида ўтказилмоқда. Турнир 19 июль куни якунланади.
