“Бу бутун минтақа учун тарихий воқеа” — Қардош давлатлар раҳбарлари Ўзбекистон терма жамоасига омад тилади
Қозоғистон, Қирғизистон ва Тожикистон фуқаролари ҳам Ўзбекистон терма жамоасига мухлислик қилаётгани таъкидланди.
Тошкентда бўлиб ўтган учрашувлар чоғида Озарбайжон Бош вазири Али Асадов, Тожикистон Бош вазири Қоҳир Расулзода ҳамда Қирғизистон Вазирлар Маҳкамаси раиси Одилбек Қосималиев футбол бўйича Жаҳон чемпионатида илк бор иштирок этаётган Ўзбекистон миллий терма жамоасига муваффақият тиладилар.
Шавкат Мирзиёев билан учрашувлар давомида қардош давлатлар ҳукумат раҳбарлари Ўзбекистон терма жамоаси нафақат мамлакат, балки бутун минтақа шарафини ҳимоя қилаётганини таъкидлаб, жамоага ўз қўллаб-қувватловларини билдирдилар.
Озарбайжон Бош вазири Али Асадов Ўзбекистоннинг Жаҳон чемпионатига йўл олишини тарихий муваффақият деб атаб, Озарбайжон халқи терма жамоага мухлислик қилишини маълум қилди.
Шунингдек, қардош давлатлар раҳбарлари Ўзбекистоннинг Колумбияга қарши учрашувида муваффақият қозонишига ишонч билдириб, АҚШда яшаётган Қозоғистон, Қирғизистон ва Тожикистон фуқаролари ҳам Ўзбекистон терма жамоасини қўллаб-қувватлаётганини қайд этдилар.
Уларнинг таъкидлашича, Ўзбекистоннинг Жаҳон чемпионатидаги иштироки нафақат МДҲ ҳудуди, балки бутун минтақа учун муҳим ва тарихий воқеа ҳисобланади.
