Навоийда савдо дўконлари ва омборхона ёниб кетди
Ёнғин қуршаб олинганидан сўнг қарийб бир соат ичида тўлиқ бартараф этилди. Жабрланганлар ҳақида маълумот келиб тушмаган.
Навоий вилоятининг Учқудуқ туманида савдо дўконлари ва омборхонада ёнғин содир бўлди. Бу ҳақда вилоят Фавқулодда вазиятлар бошқармаси маълум қилди.
Қайд этилишича, 16 июнь куни соат 18:35 да туманнинг “Мустақиллик” маҳалласида жойлашган “EL Baraka Ul Xalq” МЧЖ ҳамда “Lider Bazar” ЯТТга тегишли озиқ-овқат ва қурилиш моллари савдо дўконлари ҳамда омборхонаси ёнаётгани ҳақида хабар келиб тушган.
Ёнғин-қутқарув экипажлари воқеа жойига 18:38 да етиб бориб, соат 19:06 да алангани қуршаб олган. Ҳодисани бартараф этишга Учқудуқ тумани ФВБ, НКМК АЖ ва “Навоиюран” ДКнинг жами олти та ёнғин-қутқарув экипажи жалб қилинган. Ёнғин соат 20:05 да тўлиқ ўчирилган.
Ҳодиса оқибатида савдо ва қурилиш моллари дўконларининг қарийб 300 квадрат метр майдони ёниб зарарланган. Шу билан бирга, савдо объектларининг 2 минг квадрат метр майдони ёнғиндан сақлаб қолинган.
Дастлабки маълумотларга кўра, ёнғин оқибатида жабрланганлар йўқ.
